کیا اسلام آباد دھرنے سے قبل حکومت نے عمران خان کی رہائی کی کوئی پیشکش کی تھی؟ رانا ثنا اللہ نے بتا دیا

وزیر اعظم کے معاون خصوصی برائے سیاسی امور اور وفاقی وزیر برائے پارلیمانی امور رانا ثنا اللہ کا کہنا ہے کہ حکومت نے پی ٹی آئی کو عمران خان کی رہائی کی کوئی پیشکشن نہیں کی تھی۔

جیو نیوز کے مارننگ شو جیو پاکستان میں گفتگو کرتے ہوئے رانا ثنا اللہ کا کہنا تھا ن لیگ نے ہمیشہ مذاکرات کی حمایت کی ہے، ہم جب اپوزیشن میں تھے اس وقت بھی چارٹر آف ڈیموکریسی کی پیشکش کی تھی۔

ان کا کہنا تھا تحریک انصاف کی طرف سے اب بھی یہی پیغام ہے کہ ہم کیوں حکومت سے رابطہ کریں، تحریک انصاف نے مذاکرات کے لیے کمیٹی بنائی ہے لیکن ہمیں اب تک بات چیت کا کوئی پیغام نہیں دیا گیا، اگر  پی ٹی آئی کی جانب سے پیغام آیا تو ہماری طرف سے انکار نہیں ہو گا۔

یہ 9 مئی کے واقعات کی مذمت کیوں نہیں کرتے اور کیوں نہیں کہتے کہ ان سے غلطی ہوئی: وفاقی وزیر 

حکومت کی جانب سے پی ٹی آئی کو عمران خان کی رہائی کی پیشکش سے متعلق سوال پر وفاقی وزیر کا کہنا تھا حکومت نے ایسی کوئی پیشکش نہیں کی تھی، فائنل کال سے پہلے تحریک انصاف سے رابط کیا گیا تھا لیکن رہائی کی کوئی بات نہیں ہوئی تھی، ہم نے ان سے کہا تھا کہ ریڈ زون کی جگہ آپ کسی اور جگہ پر اپنا احتجاج ریکارڈ کرا لیں لیکن انہوں نے انکار کر دیا۔

رانا ثنا اللہ کا کہنا تھا 9 مئی کو کن کی تنصیبات اور گھروں پر حملہ کیا گیا، یہ 9 مئی کے واقعات کی مذمت کیوں نہیں کرتے اور کیوں نہیں کہتے کہ ان سے غلطی ہوئی، یہ کہنا کہ 9 مئی کو ہم نہیں مانتے، سب کچھ کرنے والے وہ خود ہی تھے، یہ تو اور تلخی بڑھانے والی بات ہے۔

مدارس رجسٹریشن کا معاملہ بیٹھ کر سلجھایا جا سکتا ہے: رانا ثنا اللہ

مولانا فضل الرحمان کے مدارس رجسٹریشن بل پر سخت مؤقف کے حوالے سے رانا ثنا اللہ کا کہنا تھا یہ بات ٹھیک ہے کہ 26 ویں ترمیم کے معاملے پر ہم نے مولانا فضل الرحمان کو مدارس رجسٹریشن بل کی منظوری کی یقین دہانی کرائی تھی لیکن بعد میں ایک اور فریق سامنے آگیا، میرے خیال میں مدارس کی سوسائٹی ایکٹ یا وزارت تعلیم سے رجسٹریشن سے کوئی فرق نہیں پڑتا۔

ان کا کہنا تھا مدارس رجسٹریشن کے معاملے پر ڈیڈ لاک والی کوئی بات نظر نہیں آ رہی، مدارس رجسٹریشن کا معاملہ بیٹھ کر سلجھایا جا سکتا ہے۔

مسلم لیگ ن کسی صورت مذاکرات نہیں چاہتی: شوکت یوسفزئی

دوسری جانب جیو پاکستان میں گفتگو کرتے ہوئے پی ٹی آئی رہنما شوکت یوسفزئی کا کہنا تھا تحریک انصاف مذاکرات کر رہی ہے تو یہ بھاگ رہے ہیں، مسلم لیگ ن کسی صورت مذاکرات نہیں چاہتی۔

شوکت یوسفزئی کا کہنا تھا ملک کی خاطر مذاکرات ہو رہے ہیں تو ہونے چاہئیں، حکومت تکبر اور رعونت سے نکلے اور اپوزیشن کو انگیج کرے۔