21 دسمبر ، 2024 
شام میں داعش اور کرد جنگجوؤں کو ختم کرنے کا وقت آ گیا ہے: صدر اردوان
21 دسمبر ، 2024
ترکی کے صدر رجب طیب اردگان نے کہا ہے کہ شام کی بقا کیلئے خطرہ بننے والے داعش اور کرد جنگجوؤں جیسے دہشتگرد گروہوں کو ختم کرنے کا وقت آ گیا ہے۔
قاہرہ میں ایک سربراہی اجلاس سے واپسی کے دوران صحافیوں سے بات چیت کرتے ہوئے ترک صدر نے کہا کہ شام کی بقا کے لیے خطرہ بننے والے داعش، پی کے کے اور ان کے اتحادیوں کا خاتمہ ضروری ہے۔
صدر اردوان نے کہا کہ ان کی حکومت ترکیہ کیلئے خطرہ بننے والے گروہوں کے خلاف احتیاطی اقدامات لے رہی ہے، اب وقت آ گیا ہے کہ شام میں موجود دہشتگرد تنظیموں کو غیر مؤثر بنا دیا جائے، ہمارے لیے ایسے کسی بھی خطرے کو قبول کرنا ممکن نہیں ہے۔
ترک صدر رجب طیب اردوان نے امید ظاہر کی کہ شام کی نئی قیادت ان کے ساتھ کام کرنے کا انتخاب نہیں کرے گی۔
خیال رہے کہ ترکیہ شامی ڈیموکریٹک فورسز کو ایک دہشتگرد تنظیم سمجھتا ہے کیونکہ اس کی قیادت کرد مزاحمتی تنظیم پیپلز ڈیفنس یونٹ (وائی پی جی) کے پاس ہے، جسے ترکیہ کردستان ورکرز پارٹی(PKK) سے منسلک قرار دیتا ہے۔ PKK ترک سرزمین پر کئی دہائیوں سے متحرک ہے۔
امریکا کی حمایت یافتہ شامی ڈیموکریٹک فورسز نے 2019 میں شام میں داعش کے خلاف جنگ کی قیادت کی تھی اور امریکا اسے علاقے میں شدت پسندی کے دوبارہ اُبھرنے سے روکنے کیلئے اہم سمجھتا ہے۔
