08 جنوری ، 2025 
امریکا کی مشرقی اور جنوبی ریاستوں میں برف کا طوفان، لاکھوں افراد بجلی سے محروم، ہزاروں پروازیں منسوخ
08 جنوری ، 2025
امریکا کی مشرقی اور جنوبی ریاستوں کو برف کے طوفان کا سامنا ہے جبکہ کنساس سٹی میں برفباری کا 32 سالہ ریکارڈ ٹوٹ گیا ہے۔
ٹیکساس سے گلف کوسٹ تک درجہ حرارت منفی 10 ڈگری سینٹی گریڈ تک گر گیا۔
میزوری اور کنساس میں ہونے والے حادثات میں 6 افراد ہلاک ہو گئے جبکہ واشنگٹن، میری لینڈ، ورجینیا، ویسٹ ورجینیا، کنساس، میسوری، کینٹکی اور آرکنساس میں ہنگامی الرٹ جاری کر دیا گیا۔
امریکی میڈیا کے مطابق برف کے طوفان کے باعث 2 لاکھ سے زیادہ افراد بجلی سے محروم ہو گئے جبکہ 2 ہزار سے زائد پروازیں منسوخ اور 9 ہزار تاخیر کا شکار ہو گئیں۔
ادھر برطانیہ میں بھی شدید برفباری اور سیلاب کا الرٹ برقرار ہے۔ انگلینڈ اور ویلز میں سیلاب کی 500 وارننگز جاری کی جا چکی ہیں، لنکنشائر اور لیسٹر شائر سیلاب سے سب سے زیادہ متاثر ہیں۔
سیلاب کی وارننگ کے باعث یارک شائر، نارتھ ایسٹ اسکاٹ لینڈ میں اسکول بند کر دیے گئے ہیں جبکہ متعدد ٹرینیں منسوخ کر دی گئی ہیں اور پروازیں تاخیر کا شکار ہیں۔ برطانیہ کے مختلف حصوں میں برفباری آج بھی جاری رہنے کا امکان ہے۔
