11 جنوری ، 2025 
عمران کا بیان دوسری میٹنگ کے بعد آیا، اگلی ملاقات میں درخواست کریں گے ایسے بیانات نہ آئیں: عرفان صدیقی
11 جنوری ، 2025
پاکستان تحریک انصاف سے مذاکرات کرنے والی حکومتی کمیٹی کے رکن و مسلم لیگ (ن) کے رہنما عرفان صدیقی نے کہا ہے کہ عمران خان کے بیان میں براہ راست وزیرِ اعظم کی ذات پر حملہ کیا گیا، اگلی میٹنگ میں درخواست کریں گے کہ ایسے بیانات نہ آئیں۔
جیو نیوز کے پروگرام نیا پاکستان میں گفتگو کرتے ہوئے عرفان صدیقی کا کہنا تھاکہ مذاکرات میں جو اس وقت صورتحال ہے اس کی ذمہ داری ن لیگ کی نہیں۔
انہوں نے کہا کہ پہلی میٹنگ میں بھی ہم نے کسی سے رابطہ نہیں کیا تھا لیکن وہ چیزیں آگے پہنچ گئیں، دوسری میٹنگ میں طے ہوا تھا کہ اب رابطہ پی ٹی آئی کی طرف سے ہوگا، طے ہوجانا چاہیے کہ کوئی بات اگر آگے جانی ہے تو یہ ذمہ داری کس کی ہے۔
لیگی رہنما کا کہنا تھاکہ کوئی پیچھے نہیں ہٹا، مذاکرات ٹریک پر ہیں۔
عرفان صدیقی نے کہا کہ بانی پی ٹی آئی کا بیان دوسری میٹنگ کے بعد آیا ہے، بانی پی ٹی آئی کے بیان میں براہ راست وزیراعظم کی ذات پر حملہ کیا گیا، اگلی میٹنگ میں ہم ان سے التماس کریں گے کہ ایسے بیانات نہیں آنے چاہیے۔
