پی ایس ایل 10کی پلیئرز ڈرافٹنگ مکمل،کون سا کھلاڑی کس ٹیم سےکھیلےگا؟

ایچ بی ایل پاکستان سپر لیگ (پی ایس ایل) 10 کی پلیئرز ڈرافٹنگ کی تقریب لاہور کے حضوری باغ میں منعقد ہوئی جہاں فرنچائزز مالکان اور  ٹیم منیجنمنٹ  نے ڈرافٹ کے ذریعے اپنی اپنی ٹیم تشکیل دی۔

پاکستان سپر لیگ 10 کا پلیئرز ڈرافٹ مکمل ہوگیا ہے، آسٹریلیا کے ڈیوڈ وارنر، شان ایبٹ، نیوزی لینڈ کےکین ولیمسن، ڈیرل مچل اور فن ایلن سمیت دنیا کے بڑے کرکٹرز پلیئرز ڈرافٹ میں شامل تھے۔ سرفراز احمد کوئٹہ گلیڈی ایٹرز کے کوچ مقرر کردیےگئے جب کہ آل راؤنڈر شعیب ملک کو سپلیمنٹری کیٹگری میں کوئٹہ گلیڈ ایٹرز  نے پک کیا ہے۔

لاہور قلندرز

ایچ بی ایل پی ایس ایل 10کی ڈرافٹنگ میں لاہور قلندرز نے نیوزی لینڈ کے بیٹر ڈیرل مچل، سری لنکا کے بیٹر کوشال پریرا اور  بنگلادیش کے اسپنر ریشاد حسین کو اپنے اسکواڈ کا حصہ بنالیا، انگلینڈ کے سیم بلنگز  سپلیمنٹری کیٹگری میں لاہور قلندرز میں شامل ہوگئے۔

کراچی کنگز

کراچی کنگز  نے آسٹریلیا کے جارح مزاج بیٹر ڈیوڈ وارنر، نیوزی لینڈ کے فاسٹ بولر ایڈم ملنے اور  بنگلادیشی بیٹر لٹن داس کو شامل کیا ہے جب کہ نیوزی لینڈ کے کین ولیمسن اور افغانستان کے محمد نبی بھی سپلیمنٹری کیٹگری میں کراچی کنگز کی نمائندگی کریں گے۔

پشاور زلمی

پشاور  زلمی میں انگلش بیٹر ٹام کوہلر کیڈ مور، جنوبی افریقی آل راؤنڈر کوربن بوش، افغانستان کے بیٹر نجیب اللہ  زادران اور  آسٹریلیا کے نوجوان بیٹر میکس برائنٹ شامل ہیں، سپلیمنٹری کیٹگری میں الزاری جوز ف کو شامل کرلیا گیا۔

ملتان سلطانز 

ملتان سلطانز  نے ڈرافٹ سے نیوزی لینڈ کے بیٹر مائیکل بریسویل، بنگلادیش کے فاسٹ بولر ناہید رانا، ویسٹ انڈیز کے لیفٹ آرم اسپنر گوداکیش موتی اور آئرلینڈ کے لیفٹ آرم فاسٹ بولر جوش لٹل کو پک کیا، ملتان سلطانز نے سپلیمنٹری کیٹگری میں ویسٹ انڈیز کے شائی ہوپ کو پک کیا۔

کوئٹہ گلیڈی ایٹرز

کوئٹہ گلیڈی ایٹرز نے نیوزی لینڈ کے بیٹر مارک چیپ مین، فین ایلن اور رائٹ آرم فاسٹ بولر کائل جیمی سن کو ڈرافٹ سے شامل کیا ہے۔ فرنچائز کے مالک ندیم عمر نے سابق کپتان سرفراز احمد کو نئی ذمہ داریاں دیتے ہوئے ٹیم کا کوچ اور شعیب ملک کو سپلیمنٹری پلیئر منتخب کیا ہے۔

اسلام آباد یونائیٹڈ

اسلام آباد یونائیٹڈ نے آسٹریلیا کے بیٹر میتھیو شارٹ اور  ویسٹ انڈیز کے آل راؤنڈر جیسن ہولڈرکو اپنے اسکواڈ کا حصہ بنالیا۔ سپلیمنٹری کیٹگری میں جنوبی افریقا کے وین ڈر ڈیوسن بھی اسلام آباد یونائیٹڈ میں شامل ہوگئے۔