24 جنوری ، 2025 
بھارتی اداکارہ کیساتھ انوکھا واقعہ، ڈیلیوری بوائے نے بھارت اور انگلینڈ میچ کے ٹکٹ چوری کرلیے
24 جنوری ، 2025
بھارت میں اداکارہ سواستیکا مکھرجی کے ساتھ انوکھا واقعہ پیش آیا جس میں ڈیلیوری بوائے بھارت اور انگلینڈ کے درمیان پہلے ٹی ٹوئنٹی میچ کی ٹکٹ لے کر فرار ہوگیا۔
بھارتی میڈیا کے مطابق اداکارہ نے انسٹاگرام پر ایک پوسٹ شیئر کی جس میں بتایا کہ 22 جنوری کو کولکتہ کے ایڈن گارڈنز میں ہونے والے میچ کے 2 ٹکٹس ایک ڈیلیوری بوائے نے ان کے گھر سے چوری کرلیے۔
میچ سے چند گھنٹے قبل اداکارہ نے ٹکٹ چوری کے حوالے سے پوسٹ شیئر کی اور مداحوں کو اطلاع دی جب کہ ساتھ ہی سواستیکا نے رائیڈر کے خلاف شکایت درج کرائی۔
اداکارہ نے پوسٹ میں لکھا کہ ٹکٹس کا آرڈر شام 6:30 پر دیا گیا تھا لیکن ڈیلیوری رائیڈر نے 5:30 بجے آرڈر پہنچا دینے کا نشان لگا دیا اور میرا نمبر بلاک کردیا جس پر ہم نے کمپنی کو شکایت بھی کی تاہم کوئی کارروائی عمل میں نہیں لائی گئی۔
انہوں نے بتایا کہ وہ ٹکٹ میرے بوائے فرینڈ کے والد کے لیے تھے جو کرکٹ کے بہت شوقین ہیں، انہیں لائیو میچ دیکھنا تھا لیکن وہ نہیں دیکھ سکے۔
سواستیکا نے لکھا کہ میچ شروع ہونے سے قبل تمام ٹکٹ فروخت ہوگئے تھے جس نے ان کی میچ دیکھنے کی امیدوں کو توڑ دیا۔
سواستیکا مکھرجی نے اپنی تصویر اور فون نمبر سمیت ڈیلیوری ایگزیکٹو کی تفصیلات کے ساتھ آرڈر کا اسکرین شاٹ بھی شیئر کیا۔
