28 جنوری ، 2025 
کراچی کے نوجوان کی محبت میں گرفتار امریکی خاتون پاکستان پہنچ کر دربدر
28 جنوری ، 2025
کراچی کےنوجوان کی محبت میں گرفتار امریکی خاتون اونیا اینڈریو رابنسن شوہر سے طلاق لے کر پاکستان آنے کے بعد دربدر ہوگئی۔
کراچی کے علاقے گارڈن ویسٹ سے تعلق رکھنے والے 19 سالہ نوجوان نے امریکی ریاست نیویارک سے تعلق رکھنے والی 33 سالہ امریکی خاتون کو اپنی محبت کے جال میں پھنسایا تھا۔
یہ خاتون نوجوان کی محبت میں گرفتار ہوکرپاکستان آگئی تاہم لڑکے کی جانب سے ٹکا سا جواب ملنے کے بعد پاسکتان میں دربدر ہوگئی۔
کراچی آنے کے لیے خاتون نے 5 اکتوبر 2024 کو پاکستان کے ویزا کے لیے اپلائی کیا اور اسے 9 اکتوبر 2024 کو پاکستان کا سیاحتی ویزا ایک ماہ کے لیے جاری کیا گیا تھا۔
خاتون جب کراچی پہنچی تو لڑکے کے والدین یہ جان کرحیران رہ گئے کہ ان کے بیٹے نے جسے پسند کیا ہے وہ ان کے بیٹے سےعمر میں تقریباً دو گنا بڑی ہے، شوہر سے طلاق لے کر آئی ہے اور 2 بچوں کی ماں بھی ہے۔
والدین کی ناراضی پر نوجوان اس خاتون کو چکمہ دے کر غائب ہوا تو خاتون جو رقم لائی تھی اس کی مدد سے کچھ دن گزارے پھر ائیرپورٹ آکربیٹھ گئی اور تقریباً 7 روز سے وہ کراچی ائیرپورٹ پر موجود ہے۔
یہ محض اتفاق ہے کہ گورنر سندھ کامران ٹیسوری اندرون سندھ دورے سے واپسی پر کراچی ایئرپورٹ پہنچے تو خاتون کو پریشانی کی حالت میں دیکھا اور تب یہ معاملہ کھلا۔
گورنر سندھ نے خاتون کو فوری طورپر پاکستان کا ویزا جاری کرادیا ہے، پیر کو جاری یہ ویزا 11 فروری تک کے لیے ہے، ساتھ ہی گورنر سندھ نے خاتون کی امریکا واپسی کے ٹکٹ کا بھی بندوبست کرادیا ہے۔
