29 جنوری ، 2025 
پاکستانی ایتھلیٹ سعودیہ میں منعقدہ الٹرا میراتھون میں50 پلس ایج گروپ میں پہلے نمبر پر رہے
29 جنوری ، 2025
پاکستانی ایتھلیٹ فدا محمد نے سعودی عرب میں ہونے والی الٹرا میراتھون میں شاندار کارکردگی کا مظاہرہ کیا ہے۔
العلا ٹریل ریس میں پاکستان کے فدا محمد نے 50 کلو میٹر کا دشوار گزار راستہ 5 گھنٹے، 39 منٹ اور 48 سیکنڈز میں طےکیا۔ فدا محمد ایونٹ میں مجموعی طور پر تیرہویں جب کہ 50 پلس ایج گروپ میں پہلے نمبر پر رہے۔
فدا محمد 6 گھنٹے سے کم وقت میں ریس مکمل کرنے والے 50 سال سے زائد عمر کے واحد ایتھلیٹ تھے۔ 50 پلس ایج گروپ میں دوسرے نمبر پر آنے والے ایتھلیٹ نے ریس سات گھنٹے 14 منٹ میں مکمل کی تھی۔
سعودی عرب کے تاریخی شہر العلا کی الٹرا میراتھون میں رنرز فلیٹ ٹریکس کے ساتھ، پہاڑی اور ریتلے راستوں سے بھی گزرے۔
فدا محمد کا کہنا ہےکہ العلا ٹریل رن میں صلاحیتوں کا بھرپور امتحان تھا، خوش ہوں کہ بھرپور انداز میں الٹرا میراتھون مکمل کی۔
فدا محمد اگلے ماہ سعودی عرب میں ریاض میراتھون میں بھی حصہ لیں گے۔
