چیمپئنز ٹرافی کے ٹکٹوں کی خریداری کیلئے شائقین کی لمبی قطاریں لگ گئیں

آئی سی سی چیمپئنز ٹرافی کے ٹکٹوں کی کاؤنٹر سیلز کا ملک بھر میں آغاز ہوگیا اور کراچی، لاہور اور راولپنڈی اسلام آباد میں شائقین کی لمبی لمبی قطاریں لگ گئیں۔

لاہور میں نجی کوریئر کمپنی کے دفاتر پر انتہائی رش دیکھنے میں آیا، شائقین نے آسٹریلیا، انگلینڈ اور پاکستان کے میچز کےٹکٹس خریدنے میں دلچسپی ظاہر کی۔

راولپنڈی اسلام آبا د میں بھی شائقین اپنی پسند کے مقابلے کا ٹکٹ حاصل کرنے پر خوش ہوئے، کئی مایوس بھی لوٹے۔

کراچی میں بھی آؤٹ لیٹس پر بھی لمبی لمبی قطار یں لگیں اور شائقین ٹکٹ حاصل کرنے کی جستجو میں رہے۔

ایک شناختی کارڈ پر چار ہی ٹکٹس ملیں گے جبکہ آن لائن ٹکٹ بک کرنے والوں کو آج ٹکٹ نہیں ملیں گے جنہوں نے آن لائن ٹکٹ بک کروائے ہیں انہیں 6 فروری کو ٹکٹیں ملیں گی اور آن لائن ٹکٹ بک کرانے والوں کو ہوم ڈیلیوری 8 فروری کو ہوگی۔

تمام سینٹرز میں ٹکٹوں کی فروخت شام 6 بجے تک جاری رہے گی۔

پاکستان اور نیوزی لینڈ کے درمیان میچ 19 فروری کو نیشنل اسٹیڈیم میں کھیلا جائے گا اور پاکستان نیوزی لینڈ میچ کے جنرل اسٹینڈ کا ٹکٹ دو ہزار روپے کا ہے، فرسٹ کلاس کا 4 ہزار، پریمیم اسٹینڈ کا 7 ہزار اور وی آئی پی کا 12 ہزار روپے ٹکٹ کی قیمت ہے۔

اس کے علاوہ سہ ملکی ون ڈے سیریز کے ٹکٹوں کی فروخت منگل سے شروع ہوگی، شائقین کی سہولت کے لیے ٹکٹ 350 روپے کی کم ترین قیمت پر دستیاب ہیں۔

میزبان پاکستان کے ساتھ نیوزی لینڈ اور جنوبی افریقہ پر مشتمل سہ ملکی سیریز کے ٹکٹوں کی فروخت 4 فروری بروز منگل شام 4 بجے سے شروع ہوگی۔ آن لائن ٹکٹ دستیاب ہوں گے جبکہ فزیکل ٹکٹ بھی منگل سے فروخت کیلئے دستیاب ہوں گے۔ ایک شناختی کارڈ پر سہ فریقی سیریز کے لیے دس ٹکٹ خریدے جاسکتے ہیں، سہ فریقی سیریز 8 سے 14 فروری تک لاہور اور کراچی میں کھیلی جائے گی۔