05 فروری ، 2025 
اردو کے نامور شعرا کو کامک کرداروں میں پیش کرنے پر ریختہ کو تنقید کا سامنا
05 فروری ، 2025
اردو زبان کے فروغ کیلئے کام کرنے والی معروف بھارتی ویب سائٹ ریختہ کو نامور شعرا کو کامک کرداروں میں پیش کرنے پر تنقید کا سامنا ہے۔
گزشتہ دنوں ریختہ نے اردو کے معروف شعرا کی تصاویر آرٹیفیشل انٹیلی جنس (اے آئی) کا استعمال کرتے ہوئے سپر ہیروز کے کردار میں اپنے آفیشل فیس بک پیج پر شیئر کیں۔
ان تصاویر میں شاعر میر تقی میر کو بیٹ مین، مرزا غالب کو سپر مین، علامہ محمد اقبال کو آئرن مین، فیض احمد فیض کو کیپٹن امریکا، جون ایلیا کو ڈاکٹر اسٹرینج، پروین شاکر کو بلیک وِڈو اور اکبر الہ آبادی کو ڈیڈ پول بنا کر پیش کیا گیا۔
اس کے علاوہ حبیب جالب کو ونٹر سولجر اور مجروح سلطان پوری کو ہاک آئی، ناصر کاظمی کو اسپائیڈرمین، جوش ملیح آبادی کو ہَلک دکھایا گیا۔
شعرا کی تصاویر پر ان کے اشعار بھی لکھے گئے تاہم سوشل میڈیا صارفین کو شعرا کو کامک کرداروں میں دکھانا بالکل پسند نہیں آیا۔
سوشل میڈیا صارفین نے ریختہ کی پوسٹ پر ہی تنقید کی اور رضا حیدر نامی صارف نے لکھا کہ ’پس ہر شعبہ ہی زوال پذیر ہے یہ تذلیل کی انتہا ہے۔
اس کے علاوہ ایک اور صارف نے لکھا کہ حیرت ہے ریختہ جیسے سنجیدہ ادبی پلیٹ فارم کے آفیشل سوشل میڈیا اکاؤنٹس سے یہ سب کیا جا رہا ہے۔
