کھیل

ڈوپ ٹیسٹ مثبت آنے پر پاکستان اسپورٹس بورڈ نے 8 ایتھلیٹس پر پابندیاں لگادیں

07 فروری ، 2025

ڈوپ ٹیسٹ مثبت آنے پر پاکستان اسپورٹس بورڈ نے 8 ایتھلیٹس پر پابندیاں لگادیں — فوٹو: فائل

پاکستان اسپورٹس بورڈ (پی ایس بی) نے ڈوپ ٹیسٹ مثبت آنے پر مختلف کھیلوں کے 8 کھلاڑیوں پر پابندیاں عائد کر دیں جبکہ 5 مزید ایتھلیٹس کے خلاف کارروائی جاری ہے۔

یہ پابندیاں گزشتہ برس لیے گئے ٹیسٹ کے نتائج آنے اور متعلقہ کارروائی مکمل کرنے کے بعد لگائی گئی ہیں۔

پی ایس بی کے ترجمان کے مطابق 2024 میں مجموعی طور پر 140 اینٹی ڈوپنگ ٹیسٹ کیے گئے، جن میں سے 13 ایتھلیٹس کے ٹیسٹ مثبت آئے۔

پابندی کا سامنا کرنے والے 8 کھلاڑی مختلف کھیلوں سے تعلق رکھتے ہیں، ان میں 5 ویٹ لفٹنگ، ایک باڈی بلڈنگ، ایک سائیکلنگ اور ایک کا تعلق ایتھلیٹکس سے ہے۔

ویٹ لفٹنگ میں فرقان احمد پر 2 سال، جمیل اختر اور محمد یوسف پر 3، 3 سال، جبکہ غلام حسین شاہد پر 4 سال کی پابندی عائد کی گئی ہے، ارسلان رؤف کو 3 سال کے لیے معطل کر دیا گیا ہے۔

سائیکلنگ میں نتالیہ خان اور ایتھلیٹکس کے اسپرنٹر انیس خان پر 3، 3 سال کی پابندی لگائی گئی ہے جبکہ باڈی بلڈنگ کے کھلاڑی کاشف شاہ کو 4 سال کے لیے معطل کر دیا گیا ہے۔

شاٹ پٹ کی ایتھلیٹ ماہ نور ڈوگر اور مڈل ڈسٹنس رنر ربیلہ فاروق کے ڈوپ ٹیسٹ بھی مثبت آئے ہیں، جن کے خلاف کارروائی جاری ہے۔

اسپرنٹر نوید انجم، ویٹ لفٹر ملک سبحان اور حماد علی کو بھی نوٹس جاری کر دیے گئے ہیں۔

پاکستان اسپورٹس بورڈ کے ترجمان کا کہنا ہے کہ پی ایس بی کھیلوں میں شفافیت اور ڈوپنگ جیسے غیر قانونی عمل کے خاتمے کے لیے پرعزم ہے۔

انہوں نے کہا کہ اینٹی ڈوپنگ قوانین کی خلاف ورزی کرنے والوں کے خلاف سخت کارروائی کی جائے گی تاکہ مستقبل میں کھلاڑیوں کو ممنوعہ ادویات کے استعمال سے باز رکھا جاسکے۔