08 فروری ، 2025 
ٹریفک پولیس مجھ سے رہنمائی لے، ڈمپر سے ایک بھی حادثہ ہوا تو استعفیٰ دے دوں گا:گورنر سندھ
08 فروری ، 2025
گورنر سندھ کامران ٹیسوری کا کہنا ہےکہ میں روزانہ شہرکا دورہ کروں گا اور غیرقانونی چلنے والے ٹینکرز کو پولیس کے حوالے کروں گا، ٹریفک پولیس مجھ سے رہنمائی لے، ڈمپر سے ایک بھی حادثہ ہوا تو استعفیٰ دے دوں گا۔
کراچی میں پریس کانفرنس کرتے ہوئے گورنر سندھ کا کہنا تھا کہ انہوں نے حادثات پر چیف جسٹس سندھ ہائی کورٹ اور آئی جی پولیس کو خط لکھا ہے۔
کامران ٹیسوری کا کہنا تھا کہ غفلت کے مرتکب اہلکاروں کے خلاف کارروائی ہونی چاہیے، ٹریفک پولیس میرے ساتھ بیٹھ کر مشاورت کرے اور حکمت عملی بنائے اور پھراس پرعمل درآمد کرائے تو حادثات رک جائیں گے، نہ رکے تو میں استعفیٰ دے دوں گا۔
گورنر سندھ نے یہ بھی کہا کہ اتحاد رمضان کے زیراہتمام گورنرہاؤس میں تراویح، محفل نعت، محفل سماع اور 10 لاکھ افراد کی افطاری کا بندوبست کیاگیا ہے، پہلا روزہ رکھنے والے بچوں کو دعوت دیتاہوں کہ میرے ساتھ افطارکریں۔
