12 فروری ، 2025 
ٹمبا باووماکو رن آؤٹ کرنےکے بعد سعود شکیل اورکامران غلام کے جشن پر سوشل میڈیا پر تنقید
12 فروری ، 2025
سہ ملکی سیریز کا اہم میچ آج نیشنل بینک اسٹیڈیم کراچی میں پاکستان اور جنوبی افریقا کے درمیان کھیلا جارہا ہے، اس دوران جنوبی افریقی کپتان ٹمبا باووما کو رن آؤٹ کرنے کے بعد جارحانہ انداز میں جشن منانے پر سعود شکیل اورکامران غلام کو تنقید کا سامنا ہے۔
جنوبی افریقی کپتان ٹمبا باووما نے پاکستان کے خلاف ٹاس جیت کر پہلے بیٹنگ کا فیصلہ کیا۔
اننگ کے 29 ویں اوور میں جب مہمان ٹیم کا اسکور 1 وکٹ کے نقصان پر 170 رنز تھا تو ٹمبا باووما اور نان اسٹرائیک اینڈ پر کھڑے ان کے ساتھی کھلاڑی رن لینے پر الجھ گئے اور سعود شکیل کی ڈائریکٹ تھرو سے جنوبی افریقی کپتان رن آؤٹ ہوگئے۔
اس موقع پر کامران غلام اور سعود شکیل جشن مناتے ہوئے ٹمبا باووما کے سامنے آگئے اور میدان میں گرما گرمی کا ماحول دیکھنے میں آیا تاہم جنوبی افریقی کپتان خاموش کھڑے رہے اور دیگر پاکستانی کھلاڑیوں نے سعود شکیل کو دور کیا۔
سوشل میڈیا پر رن آؤٹ اور کھلاڑیوں کے جارحانہ انداز کی ویڈیو وائرل ہوگئی ہے اور شائقین نے پاکستانی کھلاڑیوں کے اس طرز عمل کو نامناسب قرار دیا ہے۔
ایکس پر ایک صارف نے لکھا کہ اپنے ہوم گراؤنڈ پر کسی بیٹر کے سامنے اس طرح جشن منانا اچھا نہیں ہے۔
ایک صارف نے لکھا کہ اس طرح کا سخت ردعمل دینےکی کیا ضرورت ہے؟ مہمانوں کے ساتھ کچھ تو اچھا رویہ ہونا چاہیے۔
ایک اور صارف نے تنقید کرتے ہوئے کہا کہ اس میں اتنا جزباتی ہونے کی کیا بات ہے؟ اسپورٹس مین شپ کہاں ہے؟
اس کے علاوہ بہت سے صارفین نے ڈائریکٹ تھرو کرنے پر سعود شکیل کی تعریف بھی کی۔
