پاکستان

فتنہ الخوارج کو اپنی فرسودہ سوچ ملک پر مسلط نہیں کرنے دیں گے: آرمی چیف

12 فروری ، 2025

آرمی چیف جنرل عاصم منیر نےکہا ہےکہ ہم کبھی بھی فتنہ الخوارج کو اپنی فرسودہ سوچ ملک پرمسلط نہیں کرنے دیں گے۔

آئی ایس پی آر کے مطابق پاکستان کی مختلف جامعات سے آئے طلبا سے ملاقات میں گفتگو کرتے ہوئے آرمی چیف کا کہنا تھا کہ پاکستانی عوام بالخصوص نوجوانوں کا پاک فوج سے ایک انتہائی مضبوط رشتہ ہے، دشمنوں کی فوج اور عوام کے درمیان خلیج کی کوشش ہمیشہ ناکام رہی ہے اور رہےگی۔

آرمی چیف کا کہنا تھا کہ ہمیں اپنے مذہب، تہذیب اور روایات پر فخر ہے، یہ فتنہ الخوارج کس شریعت اور دین کی بات کرتے ہیں؟ ہم کبھی بھی فتنہ الخوارج کو اپنی فرسودہ سوچ ملک پر مسلط نہیں کرنے دیں گے، خیبرپختونخوا اور بلوچستان کے غیور لوگ دہشت گردوں کے خلاف آہنی دیوار کی طرح کھڑے ہیں۔

جنرل عاصم منیرکا کہنا تھا کہ نوجوان پاکستان کے مستقبل کے رہنما ہیں، طلبا اپنی تعلیم پرخصوصی توجہ دیں، طلبا خود کو ملکی ترقی کے قابل بنائیں، طلبا اپنی تعلیمی سرگرمیوں میں بہترین کارکردگی کے لیے کوشش کریں، طلبا ایسی مہارتیں حاصل کریں جو انہیں ملک کی ترقی میں مثبت کردار ادا کرنے کے قابل بنائیں، طلبا ایسے ہنر سیکھیں جن سے وہ ملک کی ترقی میں مثبت انداز میں حصہ لے سکیں۔

آرمی چیف نے پاکستان پر بیرونی اثرات، سرحد پار دہشت گردی کے خطرات کے بارے میں بھی طلبا کو آگاہ کیا، آرمی چیف نے نوجوانوں کے جذبے، تخلیقی صلاحیتوں کو سراہا، آرمی چیف نے ملکی خودمختاری اور علاقائی سالمیت کے تحفظ میں پاک فوج کےکردار کو بھی اجاگرکیا، آرمی چیف نے دہشت گردی کی لعنت کے خلاف جدوجہد میں پاکستانی عوام کی قربانیوں کو خراج تحسین پیش کیا۔