13 فروری ، 2025 
شہریار آفریدی پارٹی سے نکالے گئے شیر افضل مروت کی حمایت میں سامنے آگئے
13 فروری ، 2025
پشاور: پاکستان تحریک انصاف کے مرکزی رہنما اور سابق وزیر مملکت شہریار آفریدی پارٹی سے نکالے گئے رہنما شیر افضل مروت کی حمایت میں سامنے آگئے۔
پی ٹی آئی کے رکن قومی اسمبلی شہریار آفریدی کا میڈیا سے گفتگو کرتے ہوئے کہنا تھا 26 نومبر کو جو ہوا پوری قوم نے دیکھا، ہمارے لیڈر نے قانون کی بالادستی کی بات کی، ہم آئین و قانون کے لیے کھڑے رہیں گے۔
ان کا کہنا تھا پنجاب میں پی ٹی آئی کےکارکنوں پر ظلم کیا جا رہا ہے، جیلوں میں پی ٹی آئی کارکنوں پر تشدد کیا جا رہا ہے، فارم 47 والوں کی سیاست ختم ہو گئی ہے۔
شیر افضل مروت کو پارٹی سے نکالے جانے پر شہریار آفریدی کا کہنا تھا شیر افضل کی پارٹی کیلئے خدمات ہیں، شیر افضل مروت کیلئے بانی چیئرمین سے بات کریں گے، کل میرے سامنے بانی پی ٹی آئی نے شیر افضل مروت کو ہٹانے کی کوئی بات نہیں کی۔
یاد رہے کہ گزشتہ روز میڈیا پر یہ خبر سامنے آئی تھی کہ پاکستان تحریک انصاف نے عمران خان کی ہدایت پر شیر افضل مروت کی بنیادی پارٹی رکنیت ختم کر دی ہے۔
شہریار آفریدی نے کہا کہ قانون کی بالادستی کیلئے ہم سب نے ایک ہونا ہے، جوڈیشل کمیشن کیوں نہیں بنایا جا رہا؟ کیا رکاوٹ ہے۔
مزید خبریں :
سپریم کورٹ میں نئے ججز کی تقریب حلف برداری ملتوی
6 گھنٹے پہلے
