کے بی سی میں 5 کروڑ جیتنے والا کیا اپنی ساری دولت گنوا کر دودھ بیچ رہا ہے؟

کون بنے گا کروڑ پتی (کے بی سی) بھارت کا وہ شو ہے جس کی میزبانی امیتابھ بچن سالوں سے کرتے آرہے ہیں، اس شو میں بہت کم لوگ کروڑوں روپے جیتے ہیں  لیکن جیتنے والے کئی سالوں تک ناظرین کے ذہنوں میں رہ جاتے ہیں۔

2011 میں اس شو کے 5 ویں سیزن میں  5 کروڑ روپے کا انعام جیتنے والے سشیل کمار بھی ان ہی چند لوگوں میں سے ہیں۔

بھارتی ریاست بہار سے تعلق رکھنے والے سشیل کمار اس شو کے پہلے 5 کروڑ کا انعام جتینے والے بھی بنے تھے اور بھارت کے ہر گھر میں ان کی شہرت تھی، یہ اتنی بڑی انعامی رقم تھی کہ اس سے ان کی زندگی میں بدلاؤ آسکتا تھا لیکن ایسا نہ ہوسکا۔

انہوں نے اس کی وجہ 2020 میں اپنی فیس بک پوسٹ میں بتاتے ہوئے کہا کہ وہ نشے کے عادی ہوگئے تھے اور لوگوں نے ان کے ساتھ دھوکا دہی اور فراڈ کیا، لوگ انہیں شوز میں بلاتے اور ان سے پیسے عطیہ کرنے کا کہتے،  اس دوران ان کے بیوی کے ساتھ تعلقات خراب ہونا شروع ہوئے،  وہ اکثر کہا کرتی تھی کہ میں صحیح اور غلط لوگوں میں فرق کرنا نہیں جانتا۔

اپنی فلمی انداز کی کہانی سناتے ہوئے سشیل کمار نے کہا کہ ایک دن ایک صحافی سے گفتگو کے دوران کچھ تلخی ہوئی تو میں نے اسے غصے میں بتایا کہ میں اپنی ساری رقم ختم کرچکا اور اب گائے پال کر اور ان کا دودھ بیچ کر گزارہ کررہا ہوں۔

اس بات کو سچ سمجھتے ہوئے جب یہ خبر بنی تو یہ افواہ پھیل گئی کہ سشیل کمار کروڑ پتی ہونے کے باوجود کنگلے ہو گئے ہیں۔

سشیل کمار نے بتایا کہ اس کے بعد میرے ارد گرد موجود لوگ مجھ سے دور ہوگئے، مجھے پروگراموں میں بلانا بند کردیا گیا اور تب یہ سوچنے کا وقت ملا کہ مجھے آگے کیا کرنا چاہیے۔ 

بھارتی میڈیا کےمطابق حقیقت یہ تھی کہ سشیل کمار مکمل کنگال نہیں ہوئے تھے۔ 

انہوں نے پوسٹ میں لکھا کہ ان کی حالت بہت بہتر ہے، حقیقتاً انہیں ٹیکس کٹوتی کے بعد صرف 3.50 کروڑ روپے ملے تھے۔

سشیل کمار 2023 میں سائیکالوجی کے سرکاری ٹیچر کے طور پر منتخب ہوئے اور وہ ٹیچنگ کے علاوہ شجرکاری کی مہم چلا رہے ہیں۔