چیمپئنز ٹرافی کے موقع پر ملکی اسٹیڈیمز میں پاکستان کرکٹ کی بھرپور تشہیر کردی گئی

آئی سی سی چیمپئنز ٹرافی کے موقع پر پاکستان کرکٹ کی بھرپور تشہیر کردی گئی۔

نیشنل اسٹیڈیم کے پریس کانفرنس ایریا میں فوٹو وال سجا دی گئی، فوٹو وال پر کراچی کے کرکٹرز اور اسٹیڈیم سے جڑے اہم واقعات کی تصاویر نمایاں ہیں۔ سابق کپتان سرفراز کو نیشنل اسٹیڈیم کی وال پر نمایاں اہمیت حاصل ہے جبکہ پی سی بی نے تمام چاروں وینیوز پر اس طرح کی والز بنائی ہیں۔

کراچی کی وال پر کراچی کے کھلاڑیوں کے پورٹریٹ اور اہم لمحات کی تصاویر ہیں۔ خاتون کرکٹر کرن بلوچ اور ویمن ٹیم کی ایشین گیمز میں فتح بھی نمایاں کی گئی ہے۔

نسیم الغنی کی 1962 میں لارڈز کے میدان پر سنچری، 1958،59 میں خالد عباداللہ کی ڈیبو پر پاکستان کی جانب سے پہلی سنچری اور نیشنل اسٹیڈیم میں یونس خان کی ٹرپل سنچری بھی وال کی زینت بنی جبکہ 2004 میں خالد لطیف کی قیادت میں انڈر 19 ورلڈ کپ کی کامیابی کی تصاویر بھی وال کا حصہ ہے۔

سرفراز احمد کی قیادت میں چیمپینز ٹرافی 2017، انڈر 19 ورلڈکپ 2006 بھی وال کی زینت بنی ہیں،

کامران اکمل اور عبدالرزاق کا بھارت کے خلاف ونگ پارٹنر شپ کو بھی اجاگر کیا گیا۔ اس کے علاوہ محمد رضوان اور بابر اعظم کی تصاویر بھی وال پر لگا دی گئیں۔

بینگلور میں بھارت کے خلاف پاکستان کی یادگار کامیابی بھی وال کا حصہ ہے۔

محمد سمیع کا بھارت کے خلاف شاندار اسپیل، راشد لطیف کی تصاویر، ٹیسٹ کپتان شان مسعود، سلیم ملک، اقبال قاسم اور معین خان بھی وال کی زینت ہیں جبکہ سابق کپتان انضمام الحق کی بنگلادیش کے خلاف سنچری بھی وال کا حصہ بنی۔ 

جاوید میانداد، وقار یونس، وسیم اکرم اور عمران خان، محمد برادران، شعیب محمد، توصیف احمد اور  آصف اقبال کو خصوصی جگہ دی گئی ہے۔

ترجمان کے مطابق کراچی کے علاوہ لاہور، راولپنڈی اور ملتان میں بھی فوٹو وال بنائی گئی ہے اور وال کا مقصد ان کھلاڑیوں، ان کی خدمات اور ان لمحات کو ہمیشہ یاد رکھنا ہے۔