آئی سی سی چیمپئنز ٹرافی کا آج سے آغاز ، جیوسوپر سے تمام میچز براہ راست نشر ہونگے

آئی سی سی چیمپئنز ٹرافی کا آغاز  آج سے ہو رہا ہے، 8 بہترین ٹیموں میں چیمپئن بننے کی جنگ ہوگی، پاک بھارت ٹاکرا 23 فروری کو دبئی میں ہوگا۔کراچی، لاہور، راولپنڈی اور دبئی میں گھمسان کا رنگ پڑےگا، جیو سوپر اور  جیونیوز  پر بھی ماہرین کے دھواں دھار تبصرے ہوں گے۔

کرکٹ کے دیوانوں کے لیے بڑی خوشخبری ہےکہ دنیائے کرکٹ کے سب سے سنسنی خیز اور شاندار  ٹورنامنٹ آئی سی سی چیمپئنز ٹرافی 2025 کا آغاز  آج سے پاکستان میں ہونے جا رہا ہے۔

پاکستان کے پہلے نجی اسپورٹس چینل ”جیوسوپر“ سے ایونٹ کے تمام میچز براہِ راست نشر کیے جائیں گے۔

پاکستان میں بسنے والے کرکٹ کے دیوانوں کے لیے یہ لمحہ کسی خواب سے کم نہیں، جو اب حقیقت میں بدلنے جا رہا ہے۔ایونٹ کا افتتاحی معرکہ 19 فروری کو کراچی کے نیشنل اسٹیڈیم میں ہوگا، جہاں میزبان پاکستان اور  نیوزی لینڈ کی ٹیمیں ایک دوسرے کے مدمقابل ہوں گی۔

کرکٹ کے شائقین کو سنسنی خیز بیٹنگ، جاندار بولنگ اور شاندار فیلڈنگ دیکھنے کو ملے گی جو اِن میں مزید جوش و جذبہ بھر دے گی۔

23 فروری کو پاک بھارت ہائی وولٹیج ٹاکرا ہوگا۔ کرکٹ کی دنیا کے سب سے بڑے حریف پاکستان اور بھارت دبئی میں آمنے سامنے ہوں گے، یہی وہ موقع ہے جس کا انتظار کروڑوں شائقین بے صبری سے کر رہے ہیں کیونکہ یہ صرف ایک میچ نہیں، بلکہ ایک جذباتی جنگ بھی ہوگی، جہاں ہر چوکے، ہر چھکے اور ہر وکٹ پر جوش و خروش اپنے عروج پر ہوگا۔

دوسری طرف ”جیوسوپر“ اور ”جیونیوز“ کرکٹ کے ہر لمحے کو ناظرین کے ساتھ یادگار بنائیں گے۔ کرکٹ کے نامور ماہرین کی تجزیہ کار ٹیم شائقین کو چیمپئنز ٹرافی کے ہر لمحے کی خبر دے گی۔

اس پینل میں سابق کپتان راشد لطیف، فاسٹ بولر محمد عامر، جارح مزاج بلے باز احمد شہزاد اور معروف کرکٹ تجزیہ کار سکندر بخت شامل ہوں گے۔

ماہرین ہر مقابلے کا تفصیلی پوسٹ مارٹم کریں گے۔ کھلاڑیوں کی کارکردگی کا جائزہ لیں گے اور سنسنی خیز لمحات پر اپنے تبصرے پیش کریں گے۔

یاد رہےکہ اس ایونٹ میں 8 ٹیمیں، چیمپئن بننے کا خواب سجا کر ایک دوسرے سے ٹکرائیں گی۔ اِن ٹیموں میں میزبان پاکستان، بھارت، آسٹریلیا، انگلینڈ، جنوبی افریقا، بنگلا دیش، افغانستان اور نیوزی لینڈ شامل ہیں۔

ہر ٹیم کا ایک ہی ہدف ہوگا کہ ہمیں چیمپئنز ٹرافی پر قبضہ جمانا ہے۔ ہر میچ فیصلہ کرے گا کہ کون راج کرے گا اور کون شکست کا سامنا کرے گا۔

چیمپئنز ٹرافی 2025 ایک ایسا ایونٹ ہوگا جس میں ہر گیند، ہر وکٹ اور ہر شاٹ کرکٹ دیوانوں کی دھڑکنوں کو تیز کر دے گا۔ یہ وہ لمحہ ہوگا جب کرکٹ کا جنون اپنی انتہا پر پہنچے گا، جہاں ہر چھکے پر جشن، ہر وکٹ پر خوشی اور ہر جیت پر ایک نئی تاریخ لکھی جائے گی،کرکٹ کی سب سے بڑی جنگ براہ راست ”جیوسوپر“ سے نشر ہوگی۔