پنجاب حکومت کا صوبے کو عالمی معیار کے سیاحتی مرکز میں تبدیل کرنےکا فیصلہ

لاہور: پنجاب حکومت نے صوبے کو عالمی معیار کے سیاحتی مرکز میں تبدیل کرنےکا فیصلہ کیا ہے۔ 

جیو نیوز کے مطابق پنجاب حکومت نے صوبے کو  تاریخ، تہذیب اور سیاحت کا ریجنل اور انٹرنیشنل مرکز بنانےکا فیصلہ کیا ہے اور اس حوالے سے صوبے کے 170 تاریخی مقامات کو عالمی معیارکے سیاحتی مراکز میں تبدیل کرنےکا فیصلہ کیا گیا ہے۔ 

سینئر صوبائی وزیر مریم اورنگزیب نے تمام مجوزہ منصوبوں کی منظوری دے دی جس کے تحت پنجاب ٹورازم اینڈ ہیریٹیج  اتھارٹی بنانےکا فیصلہ کیا گیا ہے،  تاریخ، ورثہ اورسیاحت سے متعلق تمام ادارےاتھارٹی کے ماتحت ہوں گے  جب کہ اتھارٹی کی منظوری کے لیے سمری کابینہ کوبھجوادی گئی ہے، پنجاب کی پہلی جامع ٹورسٹ پالیسی بھی تیار کرلی گئی ہے۔ 

وزیراعلیٰ مریم نواز نے تاریخی مقامات کی 3 مراحل میں بحالی کامنصوبہ سالانہ ترقیاتی پروگرام میں شامل کرلیا ہے اور  منصوبے کی ٹینڈرنگ شروع کرنے کی ہدایت بھی کردی ہے۔

منصوبے کا پہلا مرحلہ جون میں جب کہ دیگر تاریخی مقامات کی بحالی دوسرے اور تیسرے مرحلے میں مکمل ہوگی، اس حوالے سے 16 سیاحتی منصوبوں کے پی سی ون کی فوری تیاری کی ہدایت کردی گئی ہے۔ 

منصوبےکے تحت  بانسرا گلی، ٹورسٹ ویلیج اور پارکس کی تعمیر کی جائے گی جب کہ تاریخی شہرٹیکسلا کو انٹرنیشنل ٹورسٹ سٹی بنانے کا فیصلہ بھی کیا گیا ہے۔ 

ٹیکسلامیوزیم کی اپ گریڈیشن، جدید ٹیکنالوجی سے ڈسپلے سینٹرزبنانےکافیصلہ کیا گیا ہے اور ٹیکسلا میں بدھ مت پیروکاروں کی سہولت کے لیے عبادت گاہیں، سدھارتا گیلریز بھی تعمیر ہوں گی جب کہ سکھ برادری کی سہولت کے 46 غیر فعال گوردوارے بحال کرنےکی بھی منظوری دے دی گئی ہے۔ 

پنجاب حکومت نے منصوبے کے تحت سوئٹزرلینڈ کی طرز پر چھانگا مانگا کو جدید تفریح گاہ بنانےکی منظوری بھی دی ہے جب کہ سیاحت کےفروغ کے لیے بہترین سڑکیں تعمیر کی جائیں گی اور عالمی معیارکی جدید سہولتیں فراہم کی جائیں گی۔