26 فروری ، 2025 
حرمین شریفین میں رمضان المبارک کیلئے رضاکاروں کی رجسٹریشن شروع
26 فروری ، 2025
مکہ: مسجد الحرام اور مسجد نبوی ﷺکے شعبہ دینی امور نے رمضان المبارک 1446 ہجری کے لیے رضاکاروں کی رجسٹریشن کا اعلان کردیا۔
سعودی خبررساں ایجنسی کے مطابق سعودی وزارت افرادی قوت اور نیشنل سینٹر فار نان پرافٹ سیکٹر کے تعاون سے اس منصوبے کا مقصد زائرین کی خدمت کے لیے قومی ٹیلنٹ کو متحرک کرنا ہے۔
اس مقصد کے تحت مذہبی تخصصات میں رضاکارانہ پروگرام پیش کیے جائیں گے، جن کے تحت 100 سے زائد نئے مواقع فراہم کیے جائیں گے اور یہ پروگرام مجموعی طور پر 300 سے زائدہ گھنٹوں پر مشتمل ہوں گے۔
خبررساں ایجنسی کے مطابق رضاکاروں کی بھرتی کے لیے ایک جامع ڈیٹا بیس تیار کیا گیا ہے۔ رضاکاروں کی بھرتی زائرین کو رہنمائی اور آگاہی فراہم کرنے، میڈیا، تکنیکی شعبوں، قرآن کی تلاوت کی درستگی اور ترجمے جیسے شعبوں میں کی جا رہی ہے۔
