دنیا

غزہ میں جنگ بندی معاہدے کا پہلا مرحلہ مکمل ہوگیا

01 مارچ ، 2025

غزہ میں جنگ بندی معاہدے کا پہلا مرحلہ مکمل ہوگیا — فوٹو: اے ایف پی

غزہ میں 19 جنوری سے جاری جنگ بندی معاہدے کا پہلا مرحلہ مکمل ہوگیا۔

پہلے مرحلے میں حماس اور اسرائیل کے درمیان 25 یرغمالی اور سیکڑوں فلسطینی قیدیوں کا تبادلہ ہوا۔

حماس نے اسرائیلی تجاویز کے ساتھ پہلے مرحلے میں توسیع مسترد کردی ہے جب کہ قاہرہ میں دوسرے مرحلے کی بات چیت تاحال بے نتیجہ ہے۔ قاہرہ میں امریکی، قطری اور مصری ثالث کاروں کے ساتھ ملاقات کے بعد اسرائیلی وفد واپس آگیا۔

اقوام متحدہ کے سربراہ انتونیو گوتریس نے فریقین سے معاہدہ جاری رکھنےکا مطالبہ کیا ہے۔

یہ بھی پڑھیں

انتونیو گوتریس کا کہنا تھا کہ آنے والے دن نازک ہیں، فریقین کو اس معاہدے کے ٹوٹنے سے بچانے کے لیےکوئی کسر نہیں چھوڑنی چاہیے۔

دوسری جانب امریکا نے اسرائیل کو 3 ارب ڈالر سے زائد کا اسلحہ فروخت کرنےکی منظوری دے دی ہے۔

غیر ملکی میڈیا کے مطابق ٹرمپ انتظامیہ نے 3 ارب ڈالر کا اسلحہ، بلڈوزرز اور دیگر آلات اسرائیل کو فروخت کرنے کی منظوری دی ہے جن میں غزہ پر استعمال ہونے والا امریکی ساختہ اسلحہ بھی شامل ہے۔

امریکی ڈیفنس سکیورٹی کوآپریشن ایجنسی کا کہنا ہےکہ امریکی وزیر خارجہ مارکو روبیو نے اسرائیل کو 2.4 ارب ڈالر کے باڈیزبم اور دیگر ہتھیاروں کی فروخت پر دستخط کردیے ہیں جب کہ 675.7 ملین ڈالر کے دیگر بموں، کٹس اور 295 ملین ڈالر کے بلڈوزرز سمیت دیگر سامان فروخت کرنے کے معاہدے پر بھی دستخط کردیے گئے ہیں۔

امریکی ایجنسی کے مطابق وزیر خارجہ اسرائیل کو مزید اسلحہ کی فروخت کے لیے پرعزم ہیں جس کی انہوں نے تفصیلی وضاحت دیتے ہوئے اسے اسرائیلی حکومت کی فوری ضرورت قرار دیا ہے اورکہا ہےکہ اسرائیل کو ڈیفنس سروسز اور دیگر چیزوں کی فراہمی امریکا کے قومی مفاد میں ہے۔