03 مارچ ، 2025 
مصطفیٰ قتل کیس کا واحد گواہ ہوں، مارا گیا، اعترافی بیان کیلئے دباؤ ڈالا جا رہا ہے: ملزم شیراز
03 مارچ ، 2025
مصطفیٰ عامر کے اغواء اور قتل میں گرفتار ملزم شیزار کا کہنا ہے وہ مصطفیٰ قتل کیس کا واحد گواہ ہے لیکن پولیس کی جانب سے اعترافی بیان کے لیے دباؤ ڈالا جا رہا ہے۔
ملزم شیراز کے اعترافی بیان کے لیے تفتیشی افسر کی درخواست پر سماعت جوڈیشل مجسٹریٹ جنوبی میں ہوئی جس دوران ملزم کو بھی عدالت میں پیش کیا گیا۔
ملزم شیراز نے عدالت کو بتایا کہ ارمغان نے میرے سامنے مصطفیٰ کا بے دردی سے قتل کیا، میں کچھ نہیں کر سکتا تھا، مجھے اس کیس میں گھسیٹا جا رہا ہے۔
شریک ملزم نے کہا کہ ملزم ارمغان نے لوہے کی راڈ سے مصطفیٰ کو مارا اور مجھے گن پوائنٹ پر بلوچستان لے گیا، ملزم ارمغان نے بلوچستان لے جا کر مصطفیٰ کی ڈیڈ باڈی اور گاڑی کو آگ لگا دی۔
شیراز نے عدالت کو بتایا کہ مجھ پر دباؤ ڈالا گیا کہ اعتراف جرم کرو تو سزا کم ملے گی، پولیس اسٹیشن میں مجھ پر تشدد کیا گیا۔
عدالت نے تحریری حکمنامے میں کہا کہ ملزم اعترافی بیان نہیں دینا چاہتا لہٰذا تفتیشی افسر کی درخواست مسترد کی جاتی ہے۔
