03 مارچ ، 2025 
قلات میں سکیورٹی قافلے پر خودکش حملے میں ایک شخص جاں بحق، وزیراعلیٰ بلوچستان کی مذمت
03 مارچ ، 2025
بلوچستان کے ضلع قلات میں خودکش حملے میں ایک شخص جاں بحق ہوگیا۔
ڈپٹی کمشنر قلات بلال شبیر نے بتایا کہ قلات کے علاقے مغل زئی میں سڑک کنارے خودکش دھماکا اس وقت ہوا جب سکیورٹی فورسز کی گاڑیاں وہاں سے گزر رہی تھیں۔
دھماکے کے نتیجے میں ایک شخص جاں بحق اور چار زخمی ہوگئے۔ زخمیوں کو مقامی اسپتال میں طبی امداد دیکر کوئٹہ منتقل کردیا گیا جہاں ان کی حالت خطرے سے باہر بتائی جاتی ہے۔
دوسری جانب وزیر اعلیٰ بلوچستان سرفراز بگٹی نے قلات میں سکیورٹی فورسز کے قافلے پر خودکش حملے کی مذمت کی اور کہا کہ دہشت گردی کی بزدلانہ کارروائیاں امن و استحکام کو متاثر نہیں کر سکتیں۔
انہوں نے کہا کہ دہشتگردوں کے حملے میں شہید اہلکار عطا اللہ کو خراج عقیدت پیش کرتے ہیں۔
وزیر اعلیٰ بلوچستان نے زخمی اہلکاروں کو بہترین طبی سہولیات فراہم کرنے کی ہدایت کی۔
