کراچی: مارچ کے اوسط درجہ حرارت میں 6.3 ڈگری تک کمی، گزشتہ رات پارہ 10 ڈگری تک گرگیا

کراچی میں گزشتہ رات درجہ حرارت میں کمی دیکھی گئی جو 10 ڈگری تک گرگیا جب کہ سندھ کے دیگر شہروں میں بھی موسم ٹھنڈا رہا۔ 

محکمہ موسمیات کے مطابق مارچ کا معمول کا اوسط درجہ حرارت 19.4 ڈگری سینٹی گریڈہے تاہم گزشتہ رات کا درجہ حرارت 13.1ڈگری سینٹی گریڈریکارڈ ہوا جو مارچ کے معمول سے 6.3 ڈگری سینٹی گریڈ کم ریکارڈ ہوا۔

محکمہ موسمیات کا بتانا ہے کہ کراچی کا موسم انتہائی خشک اور ہوا میں نمی کا تناسب صرف 13 فیصد ہے، شمال مشرق سے خشک ہوائیں ہلکی رفتارسے چل رہی ہیں اور رات کا درجہ حرارت معمول سےکم رہا ہے۔

محکمہ موسمیات کے مطابق ماڑی پور اور اطراف کے علاقےکا درجہ حرارت دیگر علاقوں سےکم رہا، ماڑی پور میں درجہ حرارت 10ڈگری، جناح ٹرمینل 11.5، بن قاسم 13.6، گلستان جوہر 13.2  اور شارع فیصل پر 12.5 ڈگری سینٹی گریڈ ریکارڈ کیا گیا۔

محکمہ موسمیات کا بتانا ہے کہ آج زیادہ سےزیادہ درجہ حرارت 30 سے 31 ڈگری سینٹی گریڈتک رہنےکا امکان ہے، شام میں سمندری ہوائیں آہستہ آہستہ بحال ہونے لگیں گی جس کے بعد کل کم سے کم درجہ حرارت 16سے 18 ڈگری سینٹی گریڈ تک رہنے امکان ہے۔ 

محکمہ موسمیات کا کہنا ہے کہ جمعہ سے درجہ حرارت میں اضافہ ہونے لگے گا اور آئندہ ہفتے موسم گرم اور پارہ 37 ڈگری سینٹی گریڈ تک رہنےکا امکان ہے۔ 

دوسری جانب محکمہ موسمیات کے مطابق سندھ کے دیگر شہروں میں بھی درجہ حرارت معمول سےکم ریکارڈ کیا گیا اور کئی مقامات پر پارہ سنگل ڈیجٹ میں ریکارڈہوا۔ 

 محکمہ موسمیات کے مطابق موہن جوداڑو میں درجہ حرارت 3 ڈگری سینٹی گریڈ ریکارڈ کیا گیا جو کہ موہن جو دڑو کے معمول کےاوسط درجہ حرارت سے 11.1 ڈگری سینٹی گریڈکم ہے۔ 

اسی طرح مٹھی میں3.5، میرپور خاص 7 ڈگری، جیکب آباد میں 8 ڈگری، شہید بینظیرآباد میں 7.5 ڈگری جب کہ سکرنڈ، سکھر اور پڈعیدن میں درجہ حرارت7.5 ڈگری سینٹی گریڈریکارڈ ہوا۔