07 مارچ ، 2025 
شامی سکیورٹی فورسز نے معزول صدربشار الاسد کے 28 حامیوں کو ہلاک کر دیا
07 مارچ ، 2025
شامی سکیورٹی فورسز نے معزول صدربشار الاسد کے 28 حامیوں کو ہلاک کر دیا۔
غیر ملکی خبر رساں ایجنسی کے مطابق شام کے معزول رہنما بشار الاسد کے حامی جنگجوؤں نے جمعرات کو صوبہ لطقیہ کے قصبے جبلہ میں حکومتی فورسز پر حملہ کیا۔
لطقیہ صوبے کے سکیورٹی سربراہ لیفٹیننٹ کرنل مصطفیٰ نے بتایا کہ بشار الا اسد کے حامیوں نے جبلہ اور آس پاس کے دیہی علاقوں میں سکیورٹی گشت اور چوکیوں کو نشانہ بنایا۔
خبر رساں ایجنسی کے مطابق بشار الاسد کے حامیوں کے حملے میں 16 سیکورٹی اہلکار اور 4 عام شہری بھی ہلاک ہو گئے۔
برطانیہ میں قائم ایک مبصر تنظیم نے بتایا کہ ہلاک ہونے والے زیادہ تر سکیورٹی اہلکار شمال مغربی شام کے شہر ادلب سے تعلق رکھتے تھے، جو ان باغیوں کا ایک گڑھ تھا جنہوں نے ملک کی 13 سالہ خانہ جنگی کے دوران اسد کے خلاف لڑائی لڑی۔
تاہم جوابی کارروائی کرتے ہوئے شامی سکیورٹی فورسز نے معزول صدربشار الاسد کے 28 حامیوں کو آپریشن کے دوران ہلاک کر دیا۔
شامی سکیورٹی حکام کا کہنا ہے کہ ہم خطے میں استحکام بحال کریں گے اور اپنے عوام کی جان اور املاک کا تحفظ کریں گے۔
رپورٹ کے مطابق جھڑپوں کے بعد سکیورٹی فورسز نے کرفیو نافذ کرنےکا اعلان کیا جو جمعہ کی صبح 10 بجے تک برقرار رہے گا۔
خیال رہے کہ دسمبر میں شام میں اپوزیشن فورسز نے ملک کے بڑے شہروں پر قبضہ کرتے ہوئے سابق صدر بشار الاسد کو ملک سے فرار ہونے پر مجبور کر دیا تھا جس کے بعد 5 دہائیوں سے زائد عرصے تک شام پر حکومت کرنے والے الاسد خاندان کے اقتدار کا سورج غروب ہوا۔
بشار الاسد اپنی فیملی کے ساتھ روس فرار ہو گئے تھے جہاں انہوں نے سیاسی پناہ لے لی ہے۔
مزید خبریں :
چوروں نے گودام سے ایک کروڑ مالیت کے انسانی بال چرا لیے
06 مارچ ، 2025
