09 مارچ ، 2025 
کراچی: گلشن اقبال سے ملنے والے انسانی بازو کا معمہ حل ہوگیا
09 مارچ ، 2025
کراچی کے علاقے گلشن اقبال بلاک 19 سے ملنے والے انسانی بازو کی شناخت کرلی گئی۔
رہائشی اپارٹمنٹ کی دیوار کے ساتھ ملنے والا ہاتھ گزشتہ روز شارع فیصل پر ٹریفک حادثے میں جاں بحق ہونے والے عبد الباسط نامی شخص کا نکلا۔
پولیس کے مطابق ہفتے کی رات شارع فیصل پر نرسری کے مقام پر ٹریفک حادثے میں جاں بحق شخص کا بازو دھڑ سے الگ ہو کر لاپتا ہوگیا تھا۔
پولیس کا کہنا ہے کہ متوفی عبدالباسط کا بازو حادثے کے بعد گاڑی میں پھنس گیا تھا، حادثے کے بعد گاڑی کا ڈرائیور گاڑی سمیت فرار ہوگیا تھا۔
پولیس کا بتانا ہے کہ ممکنہ طور پر گاڑی کا ڈرائیور بازو گلشن اقبال بلاک 19 میں قائم رہائشی اپارٹمنٹ کی دیوار کے ساتھ پھینک کر فرار ہوگیا جس کی تلاش جاری ہے۔
متوفی عبدالباسط کا بازو ورثا کے حوالے کردیا گیا ہے جبکہ حادثے کا مقدمہ تھانہ فیروز آباد میں متوفی کے بھائی کی مدعیت میں درج کرلیا گیا ہے۔
ورثا کے مطابق متوفی عبد الباسط 5 بچوں کا باپ اور بلوچ کالونی پل کے قریب عمر کالونی کا رہائشی تھا۔
خیال رہے کہ آج عزیز بھٹی تھانے کی حدود میں گلشن اقبال بلاک 19 میں واقع رہائشی اپارٹمنٹ کی دیوار کے قریب کٹا ہوا انسانی بازو ملنے پر علاقے میں خوف وہراس پھیل گیا تھا۔
اطلاع ملنے پر فلاحی ادارے کے رضا کار انسانی بازو کو اٹھا کر عزیز بھٹی تھانے لے گئے تھے جہاں پولیس نے انسانی بازو کو جناح اسپتال منتقل کرنے کی ہدایت کی تھی۔
مزید خبریں :
گوجرانوالہ سے 4 انسانی اسمگلرز گرفتار
24 مارچ ، 2025
حیدرآباد میں بیوی نے شوہر کو لوہے کے راڈ سے قتل کر ڈالا
23 مارچ ، 2025
