10 مارچ ، 2025 
صاحبہ نے سیٹ پر کس ساتھی اداکار کو تھپڑ مارا جو وہ زمین پر جاگرا؟ اداکارہ نے بتادیا
10 مارچ ، 2025
پاکستان کی معروف اداکارہ صاحبہ نے ماضی میں اپنی فلم کے معاون اداکار کو تھپڑ مارنے کی روداد سنادی۔
ایک شو میں انٹرویو کے دوران صاحبہ نے بتایا کہ ماضی میں فلم کی عکسبندی کے دوران انہوں نے ساتھی اداکار کو تھپڑ مار دیا تھا جس سے وہ زمین پر جاگرا تھا۔
اداکارہ نے بتایا کہ اس فلم میں فیصل قریشی ہیرو تھے اور وہ خود ہیروئن تھیں، ایک گانے کی شوٹنگ کے دوران انہیں ایک اداکار کے ساتھ ڈانس کرکے فیصل قریشی کو جلانا تھا، وہ اداکار حد سے زیادہ اوور ایکٹنگ کر رہا تھا اور جب کیمرہ آن ہوا تو اس نے اوور ایکٹنگ کی تو میں نے اسے تھپڑ مار دیا۔
صاحبہ نے کہا کہ جس اداکار کو تھپڑ مارا تھا اس کا نام مجھے یاد نہیں ہے کیونکہ اس نے بعد میں شوبز انڈسٹری میں کام جاری نہیں رکھا، نا ہی وہ مشہور ہوا جب کہ اس واقعے کی ویڈیو ممکنہ طور پر فیصل قریشی کے پاس موجود ہے۔
اداکارہ کے مطابق فیصل قریشی نے اس کی ویڈیو بنائی تھی، اس وقت چھوٹے کیمرے ہوا کرتے تھے جس سے فیصل نے ویڈیو بنائی، آج بھی جب فیصل قریشی سے ملاقات ہوتی ہے تو وہ اس تھپڑ کو یاد کرتے ہیں۔
البتہ اداکارہ نے فلم کا نام بھی پروگرام میں نہیں بتایا، جب کہ صاحبہ کی یہ ویڈیو سوشل میڈیا پر وائرل ہے۔
