12 مارچ ، 2025 
’گڈ ٹچ بیڈ ٹچ‘ سے آگاہی بچوں کے نصاب میں شامل کی جائے، محکمہ داخلہ پنجاب کا مراسلہ
12 مارچ ، 2025
محکمہ داخلہ پنجاب نے ’گڈ ٹچ اور بیڈ ٹچ‘ سے آگاہی کیلئے اسکول ایجوکیشن ڈیپارٹمنٹ کو مراسلہ لکھ دیا۔
مراسلے میں کہا گیا ہے کہ "گڈ ٹچ بیڈ ٹچ" سے آگاہی بچوں کے نصاب میں شامل کی جائے کیونکہ بچوں کو ذاتی حفاظت کے بارے میں تعلیم دینا وقت کی ضرورت ہے۔
مراسلے کے متن کے مطابق ابتدائی کلاسز کے سلیبس میں گڈ ٹچ بیڈ ٹچ کے بارے میں آگاہی کو شامل کیا جائے، درست تعلیم اور آگاہی کے بعد بچے نامناسب رویے کو پہچان کر رپورٹ کر سکتے ہیں۔
مراسلے میں کہا گیا ہے کہ والدین اور اساتذہ بچوں کو بتائیں کہ گھر اور باہر نامناسب رویے کو کیسے رپورٹ کیا جائے۔
محکمہ داخلہ پنجاب کے مراسلے کے مطابق جنسی استحصال کا شکار بچے زندگی بھر ٹراما میں رہ سکتے ہیں، بچوں کو محفوظ بنانا اور استحصال کرنے والوں کو قانون کے شکنجے میں لانا ریاست کی ذمہ داری ہے۔
مراسلے کے متن کے مطابق بچوں کو سکھایا جائے کہ جنسی استحصال کی کوشش کرنے والوں سے ڈرنا نہیں، بے نقاب کرنا ہے، بچوں کے نصاب میں گڈ ٹچ بیڈ ٹچ ماڈیول شامل کرنے کیلیے ماہرین سے مدد لی جائے اور معاملے کی حساسیت کے پیش نظر نسلوں کو محفوظ بنانے کیلئے فوری حکمت عملی مرتب کی جائے۔
محکمہ داخلہ پنجاب چائلڈ پروٹیکشن بیورو کے ذریعے "گڈ ٹچ بیڈ ٹچ" آگاہی مہم بھی تیار کر رہا ہے۔
