حادثے کے بعد 6 دن تک گاڑی میں پھنسے رہنے والی خاتون زندہ دریافت

مثل مشہور ہے کہ جسے اللہ رکھے اسے کون چکھے، ایسا ہی کچھ امریکا میں دیکھنے میں آیا جہاں ایک خاتون کو 6 دن بعد گاڑی کے اندر زندہ دریافت کیا گیا جہاں وہ حادثے کے بعد پھنس گئی تھی۔

امریکی ریاست انڈیانا میں یہ واقعہ سامنے آیا۔

41 سالہ بریونا کاسیل گزشتہ ہفتے اپنی والدہ کے گھر سے نکلنے کے بعد گمشدہ ہوگئی تھیں۔

وہ اپنے ایک دوست سے ملنے کے لیے گئی تھیں۔

میڈیا رپورٹس کے مطابق گاڑی چلاتے ہوئے وہ سوگئی تھیں اور ان کی گاڑی ایک قصبے کے قریب سڑک سے اتر کر گہری دراڑ میں پھنس گئی۔

مقامی پولیس کے مطابق ان کی گاڑی جس جگہ پھنسی تھی وہ قریب گزرنے والی ٹریفک سے کافی دور تھی اور کسی نے ان کی مدد کی آوازیں بھی نہیں سنی تھیں۔

بریونا کاسیل کے والدین نے بتایا کہ  حادثے کے بعد چوٹوں کے باعث بیٹی کے لیے ٹانگوں کو ہلانا ممکن نہیں رہا تھا۔

خاتون کا فون بھی چارج نہ ہونے کے باعث بند ہوگیا تھا جبکہ اپنے سویٹر کی مدد سے انہوں نے قریبی جگہ سے پانی حاصل کیا۔

والدین نے بتایا کہ وہ شدید تکلیف کا۔شکار تھی اور مدد کے لیے چیختی رہی۔

پولیس کے مطابق خاتون کو وہاں قریب سے گزرنے والے ایک راہ گیر جونی مارٹینز نے دریافت کیا۔

وہ اس علاقے میں ڈرینج آلات کو چلانے کا کام کر رہے تھے۔

انہوں نے گاڑی کو دیکھ کر اپنے سپر وائزر جرمی وینڈر سے رابطہ کیا جو ایک قصبے کے فائر چیف بھی تھے۔

ان دونوں نے خاتون کو گاڑی اندر زندہ دریافت کیا۔

پولیس کے بیان میں بتایا گیا کہ انجریز کے باوجود بریونا کاسیل 6 دن تک موت سے لڑتی رہیں اور مدد کا انتظار کرتی رہیں۔

انہیں گاڑی سے نکالنے کے بعد ہیلی کاپٹر کے ذریعے شکاگو منتقل کیا گیا جہاں وہ ایک اسپتال کے آئی سی یو میں زیر علاج ہیں اور جلد ان کا آپریشن بھی ہوگا۔