کم سن امریکی بچیوں کی آن لائن پورنوگرافی اور بلیک میلنگ میں ملوث ملزم کراچی سےگرفتار

کراچی: امریکی قونصل خانےکی شکایت پر ایف آئی اے نےکارروائی کرتے ہوئے کم سن امریکی بچیوں کی نازیبا ویڈیوز  بنانے والے ملزم کو گرفتار کرلیا۔

نابالغ امریکی بچیوں کی آن لائن نازیبا ویڈیوز بناکر بلیک میلنگ میں ملوث ملزم کو ایف آئی اے سائبر کرائمز سرکل کے عملے نےکراچی کی نیو رضویہ سوسائٹی سے گرفتار کیا۔

سائبر کرائمز کے تفتیشی افسر امیر کھوسو کے مطابق ملزم آغا سرور عباس کو امریکی خفیہ ایجنسی ایف بی آئی کی امریکا میں تحقیقات کے تسلسل میں گرفتار کیا گیا۔

ملزم کم سن امریکی بچوں کی ویڈیوز بنانے کے بعد انہیں بلیک میل اور دھمکیاں دینے میں بھی ملوث ہے۔ امیر کھوسو کے مطابق امریکی قونصلیٹ کی شکایت پر ایف آئی اے سائبر کرائم سرکل کراچی میں انکوائری نمبر 2794/2024 رجسٹرڈ کی گئی تھی جس پر گلزار ہجری میں نیو رضویہ سوسائٹی میں گھر پر چھاپہ مار کر ملزم کو حراست میں لیا گیا اور لیپ ٹاپ آئی پیڈ، موبائل فون اور دیگر آلات ضبط کیےگئے۔

امیر کھوسو کے مطابق برآمد لیپ ٹاپ، آئی پیڈ اور موبائل فونز کے تکنیکی تجزیے پر نابالغ امریکی بچیوں کا ڈیٹا برآمد ڈیوائسز میں دستیاب پایا گیا جس میں ری کوڈ شدہ ویڈیوز اور دھمکی آمیز پیغامات شامل ہیں۔ تکنیکی تجزیے سے یہ بھی معلوم ہوا کہ ملزم نابالغ امریکی شہریوں کے ساتھ مختلف بالغ ویب سائٹس اور ویڈیو چیٹ رومز کے ذریعے بات چیت کرتا تھا۔ ملزم ٹیکنیکل طریقے سے بچیوں کے گھروں کے پتے نکالنے کے لیے مختلف ویب سائٹس استعمال کرتا تھا۔ ملزم بچیوں سے رابطہ کرکے قابل اعتراض ویڈیوز کو وائرل کرنے کی دھمکیاں دینے بھی ملوث  تھا۔

حکام کے مطابق تفتیش کے دوران ملزم آغا سرور عباس نے چائلڈ پورنوگرافی میں ملوث ہونے اور امریکی شہریوں کے خفیہ ڈیٹا کے غلط استعمال کا اعتراف کیا جو نابالغ ہیں،  اس نے مزید انکشاف کیا کہ رابطے میں وہ اپنی اصل شناخت چھپاتا اور امریکی شہری برینڈن لیچیئر کے طور پر رابطہ کرتا تھا۔

ذرائع کے مطابق ملزم کے خاندان کے بیشتر افراد امریکا میں مقیم ہیں اور اسے ایک سال قبل امریکا سے بے دخل کردیا گیا تھا۔