13 مارچ ، 2025 
196 نئی سڑکیں، 2 لاکھ سولر یونٹس کی تقسیم، حکومت سندھ کی ایک سالہ کارکردگی رپورٹ پیش
13 مارچ ، 2025
وزیر اعلیٰ سندھ مراد علی شاہ نے اپنی حکومت کی ایک سالہ کارکردگی رپورٹ پیش کر دی۔
وزیر اعلیٰ سندھ مراد علی شاہ نے اپنی کابینہ کے ایک سال مکمل ہونے پر تفصیلی میڈیا بریفنگ دی۔
انہوں نے کہا کہ ہماری حکومت کی تمام کامیابیاں بھٹو خاندان کے وژن اور بلاول بھٹو زرداری کی قیادت کا نتیجہ ہیں۔
وزیر اعلیٰ نے بتایا کہ 2022 کے سیلاب سے متاثرہ کسانوں کے لیے ایک لاکھ 68 ہزار “ہاری کارڈ” تقسیم کیے گئے۔ اس سال 196 نئی سڑکوں کی تعمیر مکمل کی گئی، جن پر 54 ارب روپے خرچ ہوئے۔
وزیراعلیٰ نے بتایا کہ سندھ حکومت نے 2 لاکھ سولر یونٹس تقسیم کیے، جبکہ مزید 3 لاکھ یونٹس فراہم کیے جائیں گے۔ کراچی کی مختلف سرکاری عمارتوں سمیت 24 گورنمنٹ دفاتر کو سولرائز کیا گیا۔صحت کے میدان میں، جناح اسپتال، ڈاؤ یونیورسٹی، ایس آئی یو ٹی اور انڈس اسپتال کے ساتھ پبلک پرائیوٹ پارٹنرشپ میں کام کیا جا رہا ہے، جبکہ این آئی سی وی ڈی میں 14 لاکھ مریضوں کا علاج کیا گیا۔
حکومت سندھ کی کارکردگی پر وزیر اعلیٰ نے مزید بتایا کہ ریسکیو 1122 کا مانیٹرنگ سسٹم قائم کر دیا گیا ہے اور 110 نئی ریسکیو گاڑیاں شامل کی گئی ہیں۔
وزیر اعلیٰ سندھ نے کہا کہ ان کی حکومت عوامی فلاح و بہبود کے لیے عملی اقدامات پر یقین رکھتی ہے۔
