13 مارچ ، 2025 
کھیل
اسپیشل اولمپکس ورلڈ ونٹرگیمز میں پاکستان نے 4 میڈلز جیت لیے
13 مارچ ، 2025
اسپیشل اولمپکس ورلڈ ونٹر گیمز کا فائنل راؤنڈ شروع ہوتے ہی پاکستانی ایتھلیٹس نے میڈلز جیتنا شروع کردیے، پاکستانی ایتھلیٹس اب تک ایک سونے، ایک چاندی اور دو کانسی کے تمغے جیت چکے ہیں۔
اٹلی کے شہر ٹورین میں جاری اسپیشل اولمپکس ورلڈ ونٹر گیمز کا فائنل راؤنڈ شروع ہوا تو پاکستانی ایتھلیٹس نے شاندار کارکردگی کا مظاہرہ کرکے چار میڈلز جیت لیے۔
50 میٹر کراس کنٹری اسکینگ میں پاکستان کے منیب الرحمان نے گولڈ میڈل جیتا، اس ہی ایونٹ کے ویمنز فائنل میں پاکستان کی روینہ قربان نے چاندی کا تمغہ اپنے نام کیا۔
200 میٹر اسنو شوئنگ ایونٹ میں سات پاکستانی ایتھلیٹس نے شرکت کی جس میں علی رضا اور عبدالصبور نے کانسی کے تمغے جیتے۔ باقی پانچ ایتھلیٹس ٹاپ تھری پوزیشن نہ لے سکے۔
