15 مارچ ، 2025 
عیدالفطرکب ہوگی؟ مصری اور اماراتی ماہرین فلکیات کی پیشگوئیاں سامنے آگئیں
15 مارچ ، 2025
مصری اور اماراتی ماہرین فلکیات کی جانب سے عید الفطر کی تاریخ کے حوالے سے کی گئی پیشگوئیاں سامنے آگئی ہیں۔
عرب میڈیا کے مطابق مصر کے نیشنل انسٹی ٹیوٹ فار آسٹرنومیکل اینڈ جیو فزیکل ریسرچ نے پیشگوئی کی ہےکہ اس سال مصر میں رمضان المبارک 29 دن کا ہوگا اور ہفتہ 29 مارچ کو آخری روزہ ہوگا جب کہ یکم شوال یا عید الفطر 30 مارچ بروز اتوارکو ہوگی۔
مصرکے قومی فلکیاتی ادارے نے مصرکے علاوہ دنیا کے 30 کے قریب شہروں کے نام بھی بتائے ہیں جہاں 29 مارچ کو شوال کا چاند نظر آنےکا امکان موجود ہے، ان شہروں میں مکہ مکرمہ، مدینہ منورہ، ریاض، انقرہ، تہران، مسقط، کراچی، لندن، ماسکو اور اوٹاوہ شامل ہیں۔
دوسری جناب اماراتی آسٹرونومی سوسائٹی کے چیئرمین ابراہیم الجروان کے مطابق فلکیاتی حساب سے شوال کا پہلا دن یعنی عید 30 مارچ اتوار یا 31 مارچ پیر 2025 کو ہوسکتی ہے۔
ابراہیم الجروان کے مطابق امارات میں شوال کا چاند 29 مارچ 2025 کو دوپہر 2:58 بجے مقامی وقت کے مطابق پیدا ہوگا اور سورج غروب ہونے تک چاند صرف 3 گھنٹے پرانا ہوگا اور چاند کی پوزیشن اور سورج کی روشنی کی موجودگی کے باعث چاند کا دیکھنا مشکل ہوگا، اس لیے اگر ایسا ہوا تو یکم شوال اور عید الفطر پیر 31 مارچ کو ہوگی۔
