16 مارچ ، 2025 
نوشکی دالبندین شاہراہ پرسکیورٹی فورسز کے قافلے پر خود کش حملہ، 3 اہلکاروں سمیت 5 افراد شہید
16 مارچ ، 2025
بلوچستان میں نوشکی دالبندین شاہراہ پر سکیورٹی فورسز کے قافلے پرکالعدم بلوچستان لبریشن آرمی (بی ایل اے) کے خودکش حملے میں 3 ایف سی اہلکاروں سمیت 5 افراد شہید اور متعدد زخمی ہوگئے۔
پاک فوج کے شعبہ تعلقات عامہ (آئی ایس پی آر) کے مطابق ضلع نوشکی میں سکیورٹی فورسز کے قافلے پر خود کش حملہ ہوا اور گاڑی میں سوار خودکش بمبار نے سکیورٹی فورسز کے قافلے کے قریب خود کو دھماکے سے اُڑایا۔
آئی ایس پی آر نے بتایاکہ دہشت گردوں کے حملے میں سکیورٹی فورسز کے 3 جوان اور 2 شہری شہید ہوگئے جبکہ 3 جوان اور 2 معصوم شہری زخمی ہوئے۔
آئی ایس پی آر کا کہنا کہ شہدا میں حوالدار منظور علی، حوالدار علی بلاول، نائیک عبدالرحیم، سویلین ڈرائیور جلال الدین اور محمد نعیم شامل ہیں۔
آئی ایس پی آر کے مطابق کلیئرنس آپریشن کے دوران فائرنگ کے تبادلے میں 3 دہشت گرد ہلاک ہوگئے جبکہ علاقے میں کلیئرنس آپریشن جاری رہے گا اور بزدلانہ عمل کے مرتکب افراد کو انصاف کے کٹہرے میں لایا جائے گا۔
آئی ایس پی آر نے بتایاکہ سکیورٹی فورسز بلوچستان کے امن و استحکام کو نقصان پہنچانے کی کوششوں کوناکام بنانےکےلیےپرعزم ہیں، بہادرسپاہیوں اور شہریوں کی ایسی قربانیاں ہمارےعزم کو مزید مضبوط کرتی ہیں۔
ایم ایس میر گل خان نصیر ٹیچنگ اسپتال نوشکی کا کہنا ہے کہ اسپتال میں ایمرجنسی نافذ کر دی گئی ہے۔
وزیر اعظم شہباز شریف نے نوشکی میں دھماکے کی مذمت کرتے ہوئے قیمتی جانوں کے نقصان پر اظہار افسوس کیا ہے اور کہا ہےکہ اس قسم کی بزدلانہ کارروائیاں دہشت گردی کے خلاف ہمارے عزم کو متزلزل نہیں کرسکتیں۔
وفاقی وزیر داخلہ محسن نقوی نےکہا ہےکہ معصوم لوگوں کو نشانہ بنانا سفاکیت کی انتہا ہے، اس طرح کی بزدلانہ کارروائیوں کے ذریعے قوم کے پختہ عزم کو کم زور نہیں کیا جاسکتا۔
وزیراعلیٰ بلوچستان سرفراز بگٹی نے نوشکی دالبندین شاہراہ پربس کے قریب دھماکےکی مذمت کرتے ہوئے قیمتی جانوں کے ضیاع پرگہرے دکھ اور افسوس کا اظہار کیا ہے۔
سرفراز بگٹی نے کہا ہےکہ صوبے کے امن سے کھیلنے والوں کو عبرتناک انجام تک پہنچائیں گے، بزدلانہ حملے ہمارے حوصلے پست نہیں کر سکتے، دہشت گردوں کوکہیں پناہ نہیں ملےگی، بلوچستان میں ہر قیمت پر امن قائم کریں گے۔
انہوں نے مزید کہا کہ دشمن عناصر سن لیں ریاست ان کے ناپاک عزائم خاک میں ملا دے گی، یہ جنگ آخری دہشت گرد کے خاتمے تک جاری رہےگی، امن دشمنوں کوکیفر کردار تک پہنچانے کے لیے ہر ممکن اقدم کریں گے۔
مزید خبریں :
روزہ کن چیزوں سے ٹوٹ جاتا ہے؟
3 گھنٹے پہلے
بچے کو دودھ پلانے سے روزہ ٹوٹ تو نہیں جائے گا؟
2 گھنٹے پہلے
