17 مارچ ، 2025 
دہشتگرد حملوں میں بزدلی دکھانے والے اہلکاروں کیخلاف سخت کارروائی ہوگی، ڈی جی لیویز فورس بلوچستان
17 مارچ ، 2025
ڈائریکٹر جنرل لیویز فورس بلوچستان عبدالغفار مگسی نے صوبے میں دہشت گرد حملوں کے دوران غفلت یا بزدلی کا مظاہرہ کرنے والے اہلکاروں کے خلاف سخت کارروائی کا اعلان کردیا۔
ڈی جی لیویز فورس نےکہا ہےکہ یہ اعلان بلوچستان میں حالیہ دہشت گردی کے واقعات کے تناظر میں کیا گیا ہے۔
ڈی جی لیویز فورس کا کہنا ہے کہ اگر کوئی اہلکار دہشت گردوں کے سامنے بزدلی دکھاتا ہے یا اپنی ذمہ داری میں غفلت برتتا ہے اور ہتھیار دہشت گردوں کے حوالے کرتا ہے تو اس کے خلاف سخت تادیبی کارروائی کی جائےگی اور ایسے اہلکاروں کی دوبارہ ملازمت کی درخواست کسی صورت منظور نہیں کی جائےگی۔
ڈی جی لیویز نے لیویز اہلکاروں کو دہشت گرد حملوں کا فوری اور بہادری سےجواب دینے کی ہدایت کردی ہے اور کہا ہےکہ لیویز فورس کو دہشت گردوں کے خلاف ہرممکن اقدامات کرنا ہوں گے۔
انہوں نے اس عزم کا اظہار کیا ہےکہ لیویز فورس عوام کی حفاظت کے لیے تمام تر صلاحیتوں کو بروئےکار لائےگی۔
