18 مارچ ، 2025 
نہ عامر نہ شاہین اور نہ ہی کلارک اور اینڈرسن، کوہلی کو سب سے مشکل بولر کونسا لگا؟
18 مارچ ، 2025
بھارت کے سپر اسٹار بیٹر ویرات کوہلی کا شمار بلاشبہ دنیا کے بہترین بیٹرز میں ہوتا ہے اور تینوں فارمیٹس میں شاندار ریکارڈ ان کی مہارت کا ثبوت ہے۔
اپنی بیٹنگ سے بھارت کو کئی میچز جتوا کر مخالف ٹیموں کے بولرز پر اپنی دھاک بٹھانے والے کوہلی سے ایک انٹرویو میں جب پوچھا گیا کہ انہیں اپنےکریئر میں سب سے مشکل بولر کون لگا؟ تو انہوں نے نہ تو محمد عامر، شاہین، کلارک، اینڈرسن اور پیٹ کمنز کا نام لیا بلکہ ایک بھارتی بولر کا نام بتایا۔
آئی پی ایل کی ٹیم رائل چیلنجرز بنگلور کی جانب سے سوشل میڈیا پر ایک ویڈیو شیئر کی گئی جس میں کوہلی سے اس بولر کا نام پوچھا گیا جس کا سامنا کرتے ہوئے انہیں مشکلات کا سامنا رہا۔ اس سوال کے جواب میں کوہلی نے بھارتی فاسٹ بولر جسپریت بمراہ کا نام بتایا۔
آئی پی ایل میں رائل چیلنجرز بنگلور کی نمائندگی کرنے والے کوہلی نے مزید کہا کہ اس میں کوئی شک نہیں کہ جسپریت بمراہ کرکٹ کے تمام فارمیٹس میں دنیا کے بہترین بولر ہیں۔
کوہلی کا کہنا تھا کہ بمراہ نے انہیں آئی پی ایل میں ایک سے زائد مرتبہ آؤٹ کیا ہے، یہاں تک کہ نیٹ میں پریکٹس کے دوران بھی بمراہ کو کھیلتے ہوئے ایسا لگتا ہےکہ جیسے میچ چل رہا ہو، ہر گیندکھیلنا ایک چیلنج ہوتا ہے اور میں کہنا چاہوں گا کہ یہ سب سے مزیدار لیکن سخت چیلنج ہوتا ہے۔
خیال رہےکہ بمراہ آئی پی ایل میں ممبئی انڈینز کی نمائندگی کرتے ہیں اور انہوں نے آئی پی ایل میں اپنے پہلے ہی میچ میں اپنی پہلی وکٹ کوہلی کی حاصل کی تھی۔
