دلچسپ و عجیب

2 سال کی ملازمت کے بعد مکمل پنشن کے ساتھ ریٹائر ہو جانے والا 23 سالہ نوجوان

20 مارچ ، 2025

ویسے تو خیال کیا جاتا ہے کہ ایک فرد بڑھاپے میں ملازمت سے ریٹائر ہوتا ہے جس کے بعد اسے پنشن ملتی ہے۔

مگر روس میں ایک نوجوان نے یہ حیرت انگیز کام کرکے دکھا دیا ہے اور وہ عمر کی تیسری دہائی کے شروع میں مکمل پنشن کے ساتھ ریٹائر ہوگیا ہے۔

پاؤل اسٹیفنیکو نامی 23 سالہ نوجوان ایک منفرد قانونی خامی کا فائدہ اٹھاتے ہوئے ملازمت کے محض 2 سال بعد ہی ریٹائر ہوگیا۔

پاؤل اسٹیفنیکو نے اپنے کیرئیر کا آغاز محض 16 سال کی عمر میں روسی وزارت داخلہ امور کے تعلیمی ادارے میں داخلہ لے کر کیا۔

5 برس کی سخت تربیت کے بعد اسے داخلہ امو رمیں ملازمت مل گئی مگر نوجوان کا کیرئیر 2 سال تک ہی جاری رہ سکا۔

روسی قانون کی ایک خصوصی شق کے تحت جو افراد مارشل لا کے دوران ملازمت کرتے ہیں، ان کی سروس میں ہر ماہ کے اختتام پر 3 ماہ کا اضافہ تصور کیا جاتا ہے۔

اس سے پاؤل اسٹیفنیکو کو اپنی ریٹائرمنٹ کے لیے درکار برسوں کو بہت زیادہ تیزرفتاری سے مکمل کرنے میں مدد ملی۔

28 نومبر 2023 کو اس نے ریٹائرمنٹ کی درخواست دی جو اس وقت کے روسی قانون کے مطابق قبول بھی ہوگئی اور مکمل پنشن بھی دی گئی۔

پاؤل اسٹیفنیکو کی اس غیرمعمولی کامیابی کا نوٹس انٹرنیشنل ریکارڈ رجسٹریشن ایجنسی نے لیا اور اس کی تصدیق روس کے سرکاری ریکارڈ سے کی۔

پاؤل اسٹیفنیکو اب مالی تحفظ اور مکمل آزادی حاصل کرچکے ہیں وہ بھی اس عمر میں جب بیشتر افراد اپنی پہلی ملازمت بھی شروع نہیں کرتے۔

مزید خبریں :