بھارت ہمیشہ پاکستان کو میلی آنکھ سے دیکھتا ہے: صدرمملکت

یومِ پاکستان کی پریڈ سے خطاب میں صدر مملکت آصف علی زرداری نے کہا ہے کہ  بھارت ہمیشہ پاکستان کو میلی آنکھ سے دیکھتا ہے ، فتنۃ الخوارج اور دوسرے دہشت گرد گروپ اپنے ناپاک عزائم کے حصول کے لیے کوشاں ہیں، پاکستان کے عوام اور مسلح افواج مل کر ان عزائم کو ناکام بنادیں گے۔

یوم پاکستان کے موقع پر تقریب سے خطاب میں صدر مملکت کا کہنا تھاکہ 23 مارچ کا دن پاکستانی قوم کے لیے بہت اہم ہے، بہت قربانیاں دے کر آزادی حاصل کی ہے اور آج کے دن لاکھوں مسلمانوں کی قربانیوں کی یاد تازہ کرتے ہیں، ان قربانیوں کی نتیجے میں پاکستان کا خواب حقیقت میں بدلا۔

انہوں نے کہاکہ پاکستان کے عوام اور مسلح افواج ساتھ ساتھ کھڑے ہیں، شہدا کی قربانیوں کو خراج تحسین پیش کرتے ہیں، ہم میں مشکلات پر قابو پانے کی صلاحیت موجود ہے اور ہم مشکلات سے نہیں گھبراتے۔

ان کا کہنا تھاکہ پاکستان کا مقصد مضبوط، جدید اسلامی فلاحی مملکت ہے، لاکھوں قربانیاں دے کر حاصل کی گئی آزادی کی حفاظت کرنی ہے، مادر وطن کے تحفظ اور آزادی کی حفاطت کے لیے کسی قربانی سے پیچھے نہیں ہٹیں گے، آئیے اختلاف سے بالا تر ہوکر ایک خوشحال اور پُرامن پاکستان کے لیے کام کریں، ہمیں ایک ایسا پاکستان بنانا ہے جو طاقت ور اور ترقی یافتہ ہو۔

صدر مملکت کا کہنا تھاکہ پاکستان کو بہت سارے جیو پولیٹیکل مسائل کا سامنا ہے، ہماری خارجہ پالیسی امن اور استحکام پر مبنی ہے، ہم اپنے ہمسائے ملک اور عالمی برادری کے ساتھ مضبوط تعلق رکھنے کے خواہش مند ہیں، بھارت ہمیشہ پاکستان کو میلی آنکھ سے دیکھتا ہے۔

ان کا کہنا تھاکہ  فتنۃ الخوارج اور دوسرے دہشت گرد گروپ اپنے ناپاک عزائم کے حصول کے لیے کوشاں ہیں، پاکستان کے عوام اور مسلح افواج مل کر ان عزائم کو ناکام بنادیں گے، دہشت گردی کے ناسور کے خاتمے کے لیے قوم مسلح افواج کے شانہ بشانہ ہے، ففتھ جنریشن وار فیئر ایک اہم چیلنج ہے، ہم باحوصلہ قوم ہیں، چیلنجز پر قابو پانے کی صلاحیت رکھتے ہیں، مادر وطن کے تحفظ کے لیے کسی قربانی سے دریغ نہیں کریں گے۔

انہوں نے مزید کہا کہ آج کے دن ہم کشمیری بھائیوں کو بھی نہیں بھولے جو طویل عرصے سے بھارتی مظالم کا شکار ہیں، دنیا کے ہر فورم پر کشمیریوں کے لیے آواز اٹھائیں گے، غزہ کے نہتے مسلمانوں پر مظالم قابل مذمت ہیں، عالمی برادری فلسطینی عوام کی نسل کشی روکنے کے لیے فوری فیصلہ کن اقدامات کرے۔

صدر آصف زرداری کا کہنا تھاکہ ہمارے سامنے سفر آسان نہیں لیکن ناممکن بھی نہیں، سب سےاپیل کرتا ہوں تمام تر توانائیاں ملکی ترقی کے لیے وقف کریں اور اختلافات سے بالا تر ہوکر خوشحال اور پُرامن پاکستان کے لیے کام کرنا ہے۔