25 مارچ ، 2025 
صحافی فرحان ملک کے جسمانی ریمانڈ میں توسیع کی درخواست مسترد، جیل بھیجنے کا حکم
25 مارچ ، 2025
جوڈیشل مجسٹریٹ شرقی کی عدالت نے پیکا ایکٹ میں گرفتار صحافی فرحان ملک کے جسمانی ریمانڈ میں توسیع سے متعلق وفاقی تحقیقاتی ایجنسی (ایف آئی اے) کی درخواست مسترد کردی اور انہیں جیل بھیجنے کا حکم دے دیا۔
ایف آئی اے نے پیکا ایکٹ میں گرفتار صحافی فرحان ملک کو جوڈیشل مجسٹریٹ شرقی کی عدالت میں پیش کردیا۔ فرحان ملک کی طرف سے عبدالمعیز جعفری ایڈووکیٹ عدالت میں پیش ہوئے۔ اس موقع پر اینکرز اور سینئیر صحافیوں کی بڑی تعداد کمرہ عدالت میں موجود تھی۔
فرحان ملک کے وکیل عبد المعیز جعفری نے مؤقف اپنایا کہ فرحان ملک کی کیس سے ڈسچارج کرنے کی درخواست دائر کی تھی، فرحان ملک صحافی ہیں، انہیں ہراساں کرنے کے لیے مقدمہ بنایا گیا۔
تفتیشی افسر نے عدالت کو بتایا کہ اینٹی اسٹیٹ ویڈیوز پوسٹ ہوئی ہیں، یوٹیوب چینل ہے مواد ہمارے پاس موجود ہے۔
عدالت نے ایف آئی اے کی جسمانی ریمانڈ میں توسیع کی درخواست مسترد کرتے ہوئے فرحان ملک کو عدالتی ریمانڈ پر جیل بھیج دیا۔
عدالت نے فرحان ملک کی درخواست ضمانت پر نوٹس جاری کرتے ہوئے ایف آئی اے سے 27 مارچ تک جواب طلب کرلیا۔
