دلچسپ و عجیب

100 سے زائد بارودی سرنگوں کا سراغ لگانے والے چوہے نے عالمی ریکارڈ بنادیا

10 اپریل ، 2025

100 سے زائد بارودی سرنگوں کا سراغ لگانے والے چوہے نے عالمی ریکارڈ بنادیا — کمبوڈیا 1998 میں ختم ہونے والی تقریباً 20 سالہ خانہ جنگی کا شکار رہا جو ہتھیاروں اور جنگی باقیات سے بھرا پڑا ہے/ فوٹو گنیز ورلڈ ریکارڈ

کمبوڈیا میں بارودی سرنگ کا پتا لگانے والے چوہے نے 100 سے زائد بارودی سرنگوں اور دیگر مہلک جنگی باقیات کا پتا لگانے پر نیا عالمی ریکارڈ قائم کردیا۔

غیر ملکی میڈیا کے مطابق کمبوڈیا 1998 میں ختم ہونے والی تقریباً 20 سالہ خانہ جنگی کا شکار رہا جو ہتھیاروں اور جنگی باقیات سے بھرا پڑا ہے۔

رونن نامی چوہے نے اگست 2021 سے لے کر اب تک 109 بارودی سرنگوں اور 15 ناکارہ ہتھیاروں کا پتا لگایا ہے جس نے گنیز ورلڈ ریکارڈز میں اپنی جگہ بنا لی۔

رونن ایک افریقی نسل کا چوہا ہے جسے بیلجیئم کی این جی او ’اے پی او پی او‘ نے تربیت دی جب کہ این جی او نے اس جیسے دیگر چوہوں کی بھی تریبت کی ہے۔

میڈیا رپورٹس کے مطابق چوہوں کو ایسے کیمیکلز کو سونگھنے کی تربیت دی جاتی ہے جو بارودی سرنگوں اور میدان جنگ میں چھوڑے گئے دیگر ہتھیاروں میں پائے جاتے ہیں، ان کی چھوٹی جسامت کی وجہ سے بارودی سرنگوں میں دھماکے کا خطرہ بھی نہیں ہوتا۔

این جی او کا کہنا ہے کہ چوہے ٹینس کورٹ کے سائز کے علاقے کو تقریباً 30 منٹ میں چیک کر سکتے ہیں جب کہ میٹل ڈیٹیکٹر کی مدد کے باوجود علاقے کو صاف کرنے میں 4 دن لگ سکتے ہیں۔

میڈیا رپورٹس کے مطابق رونن سے پہلے یہ ریکارڈ افریقی چوہے ماگاوا کے پاس تھا جس نے 5 سال کے دوران 71 بارودی سرنگوں کا پتا لگایا تھا اور اسے بہترین کارکردگی پر 2020 سونے کا تمغہ دیا گیا تھا۔