15 اپریل ، 2025 
بیرسٹر گوہر اور دیگر کی عمران خان سے جیل میں ملاقات، بہنیں آج بھی نہ مل سکیں
15 اپریل ، 2025
پاکستان تحریک انصاف کے بانی عمران خان سے اڈيالہ جیل میں ان کی بہنوں کی آج بھی ملاقات نہ ہوسکی۔
پی ٹی آئی کے سیکرٹری جنرل سلمان اکرم راجا کی جاری کردہ فہرست کے برخلاف فیصل چوہدری سمیت 4 دیگر لوگ بھی بانی سے مل آئے، فیصل چوہدری کے ساتھ علی عمران، رائے سلمان اور مبشر مقصود نامی افراد نے بھی بانی سے ملاقات کی۔
پی ٹی آئی کی جاری فہرست میں شامل صرف بیرسٹرگوہر اور سلمان صفدر کو ملاقات کی اجازت ملی۔ بانی پی ٹی آئی کی بہن علیمہ خان کو بھی اڈیالا جیل میں بانی پی ٹی آئی سے ملاقات کی اجازت نہیں ملی۔
عمران خان سے ملاقات کے بعد میڈيا سے گفتگو میں بیرسٹر گوہر نے کہاکہ بانی نے پارٹی لیڈرز کو ایک دوسرے کےخلاف بات کرنے سے منع کیا ہے، انہوں نے کسی کو مذاکرات کا اختیار نہيں دیا اور نہ ہی کسی کو ڈيل کے لیے دباؤ ڈالا ہے۔
ان کا کہنا تھاکہ فیملی کی ملاقات نہ کرائے جانے پر توہین عدالت کی درخواست دائر کريں گے۔ فیصل چوہدری نے کہاکہ بشریٰ بی بی کی بھی بانی سے ملاقات نہيں ہورہی تھی میں نے کروادی ہے۔
دوسری جانب میڈيا سے گفتگو میں علیمہ خان نے ملاقات کرائے جانے تک اڈيالہ جیل کےباہر بیٹھے رہنے کا اعلان کیا تاہم بعد ازاں بانی پی ٹی آئی کی بہنیں اڈیالہ جیل سے لاہور واپس روانہ ہوگئیں۔
