15 اپریل ، 2025 
اردن میں دہشتگردی کی منصوبہ بندی کے الزام میں 16 افراد گرفتار، حملے کیلئے تیار میزائل بھی برآمد
15 اپریل ، 2025
عمان: اردنی حکام کے مطابق ملک میں دہشت گردی پھیلانے کا بڑا منصوبہ ناکام بنادیا گیا۔
اردن کی جنرل انٹیلیجنس کے بیان میں کہا گیا ہے کہ دہشت گردی کی منصوبہ بندی کے الزام میں 16 افراد کو گرفتار کیا گیا ہے، ملزمان 2021 سے اپنے منصوبے کی تیاری میں مصروف تھے۔
بیان میں کہا گیا ہے کہ ملزمان نے درآمد شدہ مواد سے خطرناک میزائل، بم اور ہتھیار تیارکیے، زیرحراست ملزمان سے حملوں کے لیے تیار میزائل بھی برآمد ہوا۔
حکام کے مطابق ملزمان نے دہشت گرد ی کے لیے ڈرون استعمال کرنے کا منصوبہ بھی بنا لیا تھا، دہشت گرد گروہ نے بیرون ملک سے بھی جنگجوؤں کے خدمات حاصل کی تھیں، زیر حراست ملزمان کو اسٹیٹ سکیورٹی عدالت میں پیش کیا جائے گا۔
عرب میڈیا کا بتانا ہے کہ ابتدائی تحقیقات کے مطابق دہشت گردی کا منصوبہ اندرونی مقاصد کے لیے بنایا گیا تھا، اس منصوبے کا فلسطین، شام یا کسی بھی دیگر مسئلوں سے کوئی تعلق نہیں۔
دوسری جانب پریس کانفرنس کرتے ہوئے اردن کے وزیر رابطہ ڈاکٹر محمد مومنی کا کہنا تھاکی انٹیلی جنس ایجنسی دہشتگردی کے منصوبہ سازوں کی 2021 سے خفیہ نگرانی کر رہی تھی اور زیر حراست افراد نے لبنان میں عسکریت پسندی کی تربیت حاصل کی۔
انہوں نے کہا کہ ملزمان نے ملک کے اہم شخصیات، اداروں اور تنصیبات پر حملے کا منصوبہ بنایا تھا اور سازش کا مرکزی منصوبہ ساز لبنان میں موجود ہے۔
اردنی وزیر نے دعویٰ کیا کہ سازش میں شریک ملزمان کا تعلق کالعدم جماعت اخوان المسلمین سے ہے۔
