20 اپریل ، 2025 
سندھ میں ٹریفک قوانین کی خلاف ورزیوں پرکریک ڈاؤن، 5 روز میں 17 ہزار سے زائد موٹرسائیکلیں ضبط
20 اپریل ، 2025
سندھ حکومت کی جانب سےصوبے میں ٹریفک قوانین کی خلاف ورزیوں پر 15 اپریل سے شروع ہونے والی مہم کے تحت کریک ڈاؤن جاری ہے۔ اب تک مجموعی طور پر 17 ہزار سے زائد موٹر سائیکلوں کو ضبط کرلیا گیا ہے جب کہ 12 سو95 گاڑیوں کے خلاف کارروائی کی گئی۔
ترجمان محکمہ ٹرانسپورٹ سندھ کے مطابق سندھ حکومت کی جانب سےصوبے میں ٹریفک قوانین کے خلاف 15 اپریل سے شروع ہونے والی مہم کے تحت کریک ڈاؤن جاری ہے۔
ترجمان کے مطابق اب تک مجموعی طور پر 17,980 موٹر سائیکلیں ضبط کرلیا گیا ہے جب کہ 12سو95 گاڑیوں کے خلاف کارروائی کی گئی۔ فینسی نمبر پلیٹس، ٹنٹڈ گلاس اور دیگر غیر قانونی لوازمات کے خلاف 1,295 کارروائیاں عمل میں لائی گئیں۔ 308 ہیوی اور لائٹ ٹرانسپورٹ گاڑیاں ضبط کی گئیں۔ 230 گاڑیوں کی رجسٹریشن کو عارضی طور پر معطل کرتے ہوئے مخصوص شرائط کے تحت چھوڑا گیا۔
سینئر وزیرسندھ شرجیل انعام میمن کہتے ہیں کہ ٹریفک بے ضابطگیوں سے شہریوں کی جانوں کو خطرہ لاحق ہوتا ہے۔ کریک ڈاؤن شہریوں کی جان و مال کے تحفظ کے لیے کیے گئے عملی اقدامات کا ثبوت ہے۔
ان کا کہنا تھا کہ ٹریفک قوانین کی خلاف ورزی صرف ایک معمولی جرم نہیں بلکہ اجتماعی سلامتی کے لیے خطرہ ہے، کارروائیاں بلا تفریق جاری رہیں گی اور قانون کی خلاف ورزی کسی صورت برداشت نہیں کی جائے گی۔
انہوں نے مزید کہا کہ یہ مہم صرف آغاز ہے اور آنے والے دنوں میں مزید سخت اقدامات کیے جائیں گے۔ شہری قانون نافذ کرنے والے اداروں سے مکمل تعاون کریں اور غیر قانونی لوازمات سے گریز کریں۔
