اہل غزہ سے اظہار یکجہتی کیلئےکراچی سے پشاور تک شٹر ڈاؤن ہڑتال، کاروباری مراکز بند، سڑکوں سے ٹریفک غائب

فلسطین بالخصوص اہل غزہ سے اظہار یکجہتی کیلئے جماعت اسلامی اور تاجر تنظیوں کی ہڑتال کی کال پر ملک کے بیشتر شہروں میں کاروباری مراکز  بند رہے۔

راولپنڈی کے راجہ بازار، مری روڈ، صدر اور کمرشل مارکیٹ میں دکانیں بند رہیں جبکہ سڑکوں پر ٹریفک بھی نہ ہونے کے برابر تھی۔

ڈرگسٹ اینڈ کیمسٹ ایسوسی ایشن کی جانب سے بھی ہڑتال کی گئی جس کے باعث بیشتر بازاروں میں میڈیکل اسٹور بند رہے۔

پاکپتن اور گردونواح میں تمام چھوٹے بڑے کاروباری مراکز بند رہے۔

ملکہ کوہسار مری میں اہل غزہ سے یکجہتی کے لیے مکمل شٹر ڈاون ہڑتال رہی، جماعت اسلامی کی شٹر ڈاون ہڑتال کی کال پر تمام کاروباری مراکز بند رہے، مال روڈ، کینٹ مارکیٹ، بھوربن مارکیٹ، علیوٹ اور پھگواڑی سمیت تمام بازار اور سڑکوں پر ٹرانسپورٹ بھی کم رہی۔

پشاور میں بھی فلسطینیوں کے ساتھ اظہار یکجہتی کیلئے شٹرڈاون ہڑتال کے باعث قصہ خوانی بازار، چوک یادگار، اشرف روڈ، چوک ناصر خان اور خیبر بازار میں دکانیں بند رہیں، اہم شاہراؤں پر چھوٹی بڑی مارکیٹیں اور شاپنگ مالز بھی بند تھے۔

کوئٹہ میں بھی فلسطینیوں سے اظہار یکجہتی ہڑتال کی گئی، شہر میں تمام اہم بازار اور کاروباری مراکز بند رہے۔

مستونگ، قلات، خضدار اور پشین سمیت بلوچستان کے مختلف علاقوں میں شٹرڈاؤن ہڑتال کی گئی۔

ملک کے دیگر شہروں کی طرح کراچی میں بھی فلسطینیوں سے اظہار یکجہتی کے لیے شٹر ڈاؤن ہڑتال کی گئی، تمام چھوٹے بڑے کاروباری مراکز اور دکانیں بند جب کہ سڑکوں پر ٹریفک بھی معمول سے کم رہی۔

کورنگی كراسنگ روڈ پر سیاسی جماعت کی جانب سے فلسطین کے حق میں دھرنا دیا گیا جس کے باعث روڈ ٹریفک کے لیے بند ہوگیا، مظاہرین کی جانب سے سڑکوں کو ٹائر جلا کر ٹریفک کے لیے بند کر دیا گیا ۔

ٹریفک پولیس کا کہنا  تھا کہ دھرنے کے باعث روڈ بند ہونے کی وجہ سے ٹریفک کو گودام چورنگی اور ناصر جمپ سے چمڑا چورنگی بھیجا جا رہا ہے۔

امیر جماعت اسلامی حافظ نعیم الرحمان کا کہنا  تھا کہ پاکستانی قوم فلسطینیوں کی نسل کشی برداشت نہیں کرسکتی، قوم فلسطینیوں سے اظہار محبت اور اسرائیل امریکا کی مذمت کرے۔