انٹرٹینمنٹ

نانا پاٹیکر نے فلم پروڈیوسر سے برتن کیسے دھلوائے؟ پریش راول نے دلچسپ کہانی بتادی

26 اپریل ، 2025

نانا پاٹیکر نے فلم پروڈیوسر سے برتن کیسے دھلوائے؟ پریش راول نے دلچسپ کہانی بتادی — پریش راول ساتھی اداکار نانا پاٹیکر کے ساتھ ویلکم، کرانتی ویر، آنچ اور مالامال جیسی کئی فلموں میں کام کرچکے ہیں/ فائل فوٹو

بالی وڈ کے سینئر اداکار پریش راول نے انکشاف کیا ہےکہ نانا پاٹیکر نے ایک پروڈیوسر کو گھر بلاکر مٹن کھلایا اور پھر برتن بھی دھلوائے۔

پریش راول ساتھی اداکار نانا پاٹیکر کے ساتھ ویلکم، کرانتی ویر، آنچ اور کمال دمال مالامال جیسی کئی فلموں میں کام کرچکے ہیں۔

حال ہی میں دیے گئے ایک انٹرویو کے دوران پریش راول نے ناناپاٹیکر سے متعلق دعویٰ کیا کہ نانا پاٹیکر وہ پہلے اداکار تھے جنہوں نے ایک کروڑ معاوضے کا مطالبہ کیا اور انہیں یہ معاوضہ دیا بھی گیا۔

یہ بھی پڑھیں

پریش راول کے مطابق’ نانا پاٹیکر پہلے آرٹسٹ ہیں جنہوں نے ایک کروڑ کا معاوضہ طلب کیا ، اس وقت فلم انڈسٹری کے ہیرو بھی اتنا معاوضہ نہیں لیتے تھے اور یہی وجہ تھی کہ انڈسٹری میں بہت شور مچا لیکن نانا پاٹیکر کو یہ معاوضہ دیا گیا‘ ۔

بھارتی اداکار کا کہنا تھا کہ ’اگر کسی آرٹسٹ کا احترام کیا جائے تو وہ صرف ایک روپے میں بھی کام کرسکتا ہے لیکن اگر وہ کسی کردار کو نبھانے سے انکار کردے تو پھر 10 کروڑ کی رقم بھی اُس کا فیصلہ تبدیل نہیں کرسکتی‘۔

نانا پاٹیکر نے پروڈیوسر سے برتن کیسے دھلوائے؟

دوران گفتگو پریش راول نے نانا پاٹیکر کی جانب سے ایک پروڈیوسر سے برتن دھلوانے کی کہانی بھی شیئر کی۔

پریش راول نے بتایا ’ ایک پروڈیوسر جس کا میں نام نہیں لوں گا ، نانا پاٹیکر نے اسے گھر بلایا اور اس سے پوچھا کہ تم مٹن کھاتے ہو، اس کے اقرار پر نانا پاٹیکر نے اسے مٹن کھلایا اور پھر کہا کھالیا ؟ اب جاؤ برتن دھو، یوں نانا پاٹیکر نے اس پروڈیوسر سے برتن دھلوائے، نانا پاٹیکر بالکل مختلف آدمی ہیں‘۔