26 اپریل ، 2025 
شعیب اختر نےکس فاسٹ بولرکو پاکستان کا ابتک کا سب سے ذہین بولر قرار دیا؟
26 اپریل ، 2025
سابق پاکستانی فاسٹ بولر شعیب اختر نے محمد عامر کو پاکستان کا اب تک کا سب سے ذہین فاسٹ بولر قرار دے دیا۔
آن لائن شو میں گفتگو کرتے ہوئے شعیب اختر نے عامر کی بھرپور تعریف کی اور 2009 میں آسٹریلیا کے خلاف ایک میچ 'جس میں وہ خود بھی شامل تھے' میں عامر کی بولنگ کو یاد کیا۔
شعیب اختر کا کہنا تھا کہ ڈیوڈ وارنر مجھے مسلسل مار رہا تھا لیکن جب عامر نے بولنگ شروع کی تو وارنر کو سمجھ ہی نہیں آ رہی تھی کہ وہ آگے جائے یا پیچھے، وہ عامر کی سوئنگ اور رفتار کو پڑھ ہی نہیں سکا۔
شعیب اختر کا کہنا تھا کہ جو معیار عامر کے پاس تب تھا وہ آج بھی ہے، پی ایس ایل میں بھی اس نے وارنر کو پریشان کیا۔
راولپنڈی ایکسپریس کا کہنا تھا کہ ہمارے پاس جو بھی بولر رہے ہیں ان میں دماغ استعمال کرنے کے لحاظ سے عامر سب سے بہترین فاسٹ بولر ہے۔
شعیب اختر کا کہنا تھا کہ عامر فیلڈ پلیسمنٹ اور میچ کی صورتحال کو سمجھتا ہے اور اسی کے مطابق خود کو ڈھالتا ہے، اسے معلوم ہوتا ہے کہ کس لائن اور لینتھ پر بولنگ کرنی ہے اور فیلڈ کو کس طرح اپنی بولنگ کے مطابق سیٹ کرنا ہے۔
شعیب اختر نے محمد عامر کو پاکستان کرکٹ کے لیے ایک 'اثاثہ' قرار دیتے ہوئے اس بات پر افسوس کا اظہار کیا کہ ایسے باصلاحیت کھلاڑیوں کے ساتھ صحیح سلوک نہیں کیا گیا۔
ان کا کہنا تھا کہ کھلاڑی خراب نہیں ہوتے، منیجمنٹ خراب ہوتی ہے، اگر آپ اپنے کھلاڑیوں کی مشکل اور ضروریات کو سمجھ نہیں سکتے تو آپ کو منیجمنٹ میں رہنے کا کوئی حق نہیں۔
