28 اپریل ، 2025 
بھارت کیلئے اپنے اندرونی چیلنجز کا سامنا کرنےکے بجائے پاکستان پر الزام لگانا آسان ہے: بلاول
28 اپریل ، 2025
چیئرمین پیپلز پارٹی بلاول بھٹو زرداری کا کہنا ہے کہ بھارت کے لیے پاکستان پر الزام لگانا آسان ہے، بجائے اس کےکہ وہ اپنے اندرونی سنگین چیلنجز کا سامنا کرے، ہم نے بارہا بات چیت کی کوشش کی لیکن بھارت بات نہیں کرتا۔
غیرملکی میڈیا کو دیے گئے انٹرویو میں بلاول کا کہنا تھا کہ پاکستان دہشت گردی کے خاتمے کے سوا کچھ نہیں چاہتا، نہ صرف پاکستان سے بلکہ پورے خطے سے، بھارت نہ صرف پاکستان پر الزامات عائد کر رہا ہے بلکہ کشمیری عوام پر بھی اور جس طرح وہاں عام لوگوں اور اُن کے رشتہ داروں کے گھروں کو تباہ کیا جا رہا ہے، کشمیری عوام کو اجتماعی سزا دی جا رہی ہے، وہ بھی باعثِ تشویش ہے۔
بلاول بھٹو زرداری کا کہنا تھا کہ بھارت اور پاکستان کے درمیان کشیدگی عروج پر پہنچ چکی ہے کیونکہ جب بھی بھارت کے زیرِ قبضہ کشمیر یا بھارت میں کوئی دہشت گرد حملہ ہوتا ہے، بھارتی حکومت فوراً نہ صرف پاکستان پر الزام لگاتی ہے بلکہ جارحانہ اقدامات بھی کرتی ہے۔
بلاول بھٹو زرداری کا کہنا تھا کہ پاکستان کو مقبوضہ کشمیر تک رسائی حاصل نہیں ہے، جو دنیا کا سب سے زیادہ فوجی علاقہ ہے، لیکن پھر بھی پاکستان نے کسی بھی غیر جانبدارانہ تحقیقات میں شامل ہونے کی پیشکش کی ہے تاکہ سچ سامنے آئے۔
