20 مئی ، 2025 
نوشہروفیروز میں کینال منصوبے کیخلاف احتجاج، مظاہرین نے صوبائی وزیرداخلہ کے گھر کو آگ لگا دی
20 مئی ، 2025
نوشہروفیروز میں کینال منصوبے کے خلاف مظاہرہ کرنے والے مشتعل مظاہرین نے صوبائی وزیر داخلہ ضیا الحسن لنجار کے گھر کو آگ لگا دی۔
نوشہروفیروز کے علاقے مورو میں قومی شاہراہ پرکینال منصوبے کے خلاف مظاہرین لنجار ہاؤس میں گھس گئے، وہاں توڑ پھوڑ کی اور سامان کوبھی آگ لگا دی۔
مظاہرین نے قومی شاہراہ کے قریب کھڑے دو ٹریلر کوبھی جلادیا۔ مظاہرین کو منتشر کرنے کیلئے پولیس نے لاٹھی چارج کیا جبکہ مظاہرین نے پتھراؤ کیا۔
پولیس اور مظاہرین کے درمیان جھڑپوں کے دوران ایس ایچ، دو اہلکار اورپانچ مظاہرین زخمی ہو گئے جن کو اسپتال منتقل کردیا گیا تاہم امداد کیلئے مورو اسپتال جانے والے اہلکاروں کو مشتعل افراد نے واپس بجھوا دیا۔
پولیس کے مطابق کینال منصوبے کے خلاف احتجاج کرنے والے مظاہرین منتشر ہوگئے۔
دوسری جانب وزیرداخلہ سندھ ضیا الحسن لنجار نے ایس ایس پی نوشہرو فیروز سے تفصیلات طلب کرلیں اور قانون کی رٹ چیلنج کرنے والے عناصر کے خلاف آہنی اقدامات کیے جانے کا حکم دیا۔
