24 مئی ، 2025 
کراچی سے لاہور پہنچی پرواز شدید طوفان کے باعث خوفناک حادثے سے بال بال بچ گئی
24 مئی ، 2025
کراچی سے لاہور پہنچنے والی پرواز شدید طوفان کے باعث خوفناک حادثے سے بال بال بچ گئی۔
کراچی سے لاہور جانے والی نجی ائیرلائن کی پرواز کئی منٹ تک آندھی کی زد میں رہی اور طیارے کو طوفان کے باعث شدید جھٹکے لگے، مسافروں کی چیخیں نکل گئیں۔
نجی ائیر لائن کی پرواز ایف ایل 842 کے مسافر کلمہ طیبہ کا ورد کرتے رہے۔
پائلٹ نے بڑی مہارت سے طیارے کو واپس اڑایا، ائیر ٹریفک کنٹرول نے طیارے کو کراچی واپس بھیج دیا۔
طیارے ميں سابق وفاقی وزیر اسد عمر بھی سوار تھے، انہوں نے کہا کہ پہلی بار اتنی خطرناک صورت حال سے گزرنا پڑا، جہاز کے کپتان کا شکریہ جنہوں نے اتنی مشکل صورتِ حال کو سنبھال لیا۔
دوسری جانب طوفان سے بال بال بچی کراچی لاہور کی پرواز کے 57 مسافروں نے سفر سے انکار کردیا اور نجی ائیر لائن کی پرواز کے کراچی اترتے ہی بیشتر مسافر طیارے سے اتر گئے۔
موسم ٹھیک ہونے پر ری فیولنگ کے بعد طیارہ لاہور واپس روانگی کیلئے تیار تھا لیکن 57 افراد نے مزید سفر کرنے سے انکار کر دیا۔ ائیرپورٹ ذرائع کا کہنا ہے کہ سفر منسوخ کرنے والے مسافروں کو ان کے سامان کی واپسی میں تاخیر ہوئی۔
مسافروں کا کہنا ہے کہ لاہور کی فضا میں شدید طوفان کے سبب پرواز کو 5 مرتبہ خوفناک جھٹکے لگے، لاہور ائیرپورٹ پر لینڈنگ کے دوران بھی جھٹکے لگے، علامہ اقبال ائیرپورٹ پر لینڈنگ منسوخ کرکے پائلٹ طیارہ کراچی واپس لے آیا۔
اُدھر اسلام آباد سے لاہور پہنچی پرواز پی کے 6385 بھی کراچی منتقل کر دی گئی جبکہ شدید طوفان کے باعث کراچی کی 2 پروازیں پی کے 305، پی اے 405 کی روانگی میں تاخیر ہے۔
