عید قربان: جیونیٹ ورک پر نان اسٹاپ انٹرٹینمنٹ، بلاک بسٹر فلمیں، ٹیلی فلمز اور ڈرامے پیش کیے جائیں گے

عیدالاضحیٰ کی خوشیوں کو مزید رنگین اور یادگار بنانے کیلئے جیو نیٹ ورک نے ایک بار پھر اپنی روایت برقرار رکھتے ہوئے ناظرین کیلئے دلچسپ، چٹ پٹے اور بھرپور تفریح سے لبریز پروگراموں کا شاندار گلدستہ تیار کر لیا۔

عید کے تینوں دن خصوصی بلیٹنز، طنز و مزاح سے بھرپور پروگرامز، پاک فوج کے نوجوانوں کے ساتھ گفتگو، ٹاک شوز، مقبول ٹیلی و فیچر فلمیں، موسیقی، عید کی رونقوں پر مبنی کوریج، خصوصی ڈرامے اور ستاروں سے سجے انٹرویوز ناظرین کو جیو کی اسکرین سے باندھے رکھیں گے اور عید کی خوشیوں کو چار چاند لگا دیں گے۔

”جیونیوز“ پر ناظرین عید کے پہلے دِن مارننگ شو ”جیو پاکستان“ میں مراد علی شاہ، رانا ثنا اللہ، سعدیہ اقبال، ڈاکٹر اوم پرکاش، علامہ کوکب نورانی اور علی حسنین پراچہ کی خصوصی گفتگو ملاحظہ کرسکیں گے۔ 

پروگرام ”اسکور“ میں زمبابوے کے ٹیسٹ کرکٹر سکندر رضا مہمان بنیں گے جبکہ پاکستان ٹی ٹوئنٹی کے کپتان سلمان علی آغا ”ایک دِن جیو کے ساتھ“ کے مہمان ہوں گے۔ 

خالد مسعود، انعام الحق جاوید اور حسنین جمال کے ہمراہ ”مزاحیہ مشاعرہ“ بھی عید کی رونق بڑھائے گا۔

پروگرام ”ہنسنا منع ہے“ میں فلم ”دیمک“ کی کاسٹ سے کھٹی میٹھی گفتگو ہوگی جن میں فیصل قریشی، سونیا حسین اور ثمینہ پیرزادہ شامل ہیں۔ عید کے دوسرے دِن ”جیو پاکستان“ میں مزمل اسلم، مجتبیٰ شجاع الرحمان، شعیب نوشیروانی، نائلہ کیانی، بانو کوثر، سیدطوبیٰ علی اور سلمان پارس سے گفتگو ہوگی۔

”اسکور“ میں پاکستانی ٹیسٹ کرکٹر میر حمزہ سے عید کے حوالے سے گفتگو ہوگی۔ پروگرام ”جرگہ“ میں عاطف رانا سے کھٹی میٹھی باتیں ہوگی، ”ایک دِن جیو کے ساتھ“ میں خاتون کرکٹر عالیہ ریاض مہمان بنیں گی۔ اکرام عارفی، مرلی چوہان اور زاہد فخری کے ساتھ ”مزاحیہ مشاعرہ“ پیش کیا جائے گا۔

پروگرام ”ہنسنا منع ہے“ کا خصوصی شو (پہلا حصہ) پاک آرمی کے جوانوں کے ساتھ ہونے والی دلچسپ گفتگو پر مشتمل ہوگا۔ عید کے تیسرے دِن محمد سہیل، جاوید بلوانی، جاوید قریشی، خاقان نجیب، ملیحہ لودھی، اعزاز چوہدری ”جیوپاکستان“ کے مہمان بنیں گے۔ 

پروگرام ”جرگہ“ میں افتخار عارف کے ساتھ گفتگو ہوگی۔ طاہر شہیر، سیلمان گیلانی اور احمد سعید ”مزاحیہ مشاعرے“ میں رنگ بکھیریں گے۔ رپورٹ کارڈ اور کیپٹل ٹاک ”بجٹ اسپیشل“ ہوگا جبکہ پروگرام ”ہنسنا منع ہے“ (دوسرا حصہ) میں پاک آرمی کے جوانوں سے مزیدار گفتگو ہوگی۔

”جیو ٹی وی“نے بھی اپنے ناظرین کیلئے انٹرٹینمنٹ کی خصوصی کہکشاں سجائی ہے جہاں بلاک بسٹر فلموں کے تہلکہ خیز ایکشن، رومانس اور کامیڈی سے ناظرین لطف اندوز ہوں گے۔ عید کے پہلے دن ”عید کا اسپیشل شو“ صبح 8 بجے نشر ہوگا۔

دوپہر12بجے فیچر فلم”ایکٹر اِن لا“ دکھائی جائے گی، شام ساڑھے 6 بجے ڈرامہ سیریز ”کرولوس عثمان“ نشر ہوگی۔ ڈرامہ ”دوسرا چہرہ“ کی پہلی قسط شام7 بجے پیش کی جائے گی۔

ڈرامہ سیریل ”من مست ملنگ“ رات 8 بجے دکھایا جائے گا جبکہ سیریل ”بہکاوے“ ناظرین رات 9 بجے دیکھ سکیں گے۔ 

رات 10 بجے سیریل ”کٹھ پتلی“ اور رات ساڑھے 10 بجے ٹیلی فلم ”دِل نے کہا دِل سے“ دکھائی جائے گی۔ عید کے دوسرے دِن صبح 8 بجے ”عید شو“ اسپیشل نشر ہوگا۔ دوپہر 12 بجے فیچر فلم ”پردے میں رہنے دو“ دکھائی جائے گی۔

ڈرامہ سیریل ”کورولوس عثمان، دوسرا چہرہ، من مست ملنگ، بہکاوے اور کٹ پتلی“ عید کی رونق بڑھائے گا۔ ٹیلی فلم ”لو لائف کا لا“ بھی لطف دوبالا کرے گا۔ عید کے تیسرے دِن دوپہر 12 بجے فیچر فلم ”لوڈ ویڈنگ“ اور ڈرامہ سیریل ”ڈائن“ رات8بجے نشر ہوگا۔

یاد رہے کہ جیو سوپر اور جیو کہانی پر بھی عید کے حوالے سے خصوصی پروگرام مرتب کیے گئے ہیں۔

عید قربان: جیونیٹ ورک پر نان اسٹاپ انٹرٹینمنٹ، بلاک بسٹر فلمیں، ٹیلی فلمز اور ڈرامہ سیریز پیش کی جائیں گی

اسپیشل منی سیریل ’دوسرا چہرہ‘ دکھائی جائےگی